نئی دہلی: مغربی بنگال میں بی جے پی کے قومی صدر جے پی نڈا پر حملے پر وزارت داخلہ نے سخت موقف اختیار کیا ہے۔
ذرائع کے مطابق مرکزی وزارت داخلہ نے بنگال میں امن وامان کی صورتحال کے بارے میں پولیس کے ڈائریکٹر جنرل (ڈی جی پی) اور مغربی بنگال کے چیف سکریٹری کو طلب کیا ہے۔
اس سے قبل مغربی بنگال کے گورنر نے ریاست میں امن وامان کی صورتحال سے متعلق اپنی رپورٹ وزارت داخلہ کو پیش کی تھی۔ بی جے پی صدر جے پی نڈا پر حملے کے بعد وزارت داخلہ نے ریاست میں امن و امان کی صورتحال کے بارے میں رپورٹ طلب کی تھی۔
در اصل بی جے پی قومی صدر جے پی نڈا گذشتہ روز مغربی بنگال کے دورے پر تھے جہان انہیں مخالفت کا سامنا کرنا پڑا، اس دوران ڈائمنڈ ہاربر میں ان کے قافلے پر پتھراؤ بھی کیا گیا۔ خبروں کے مطابق قافلے میں شامل بی جے پی کے جنرل سکریٹری کیلاش وجئے ورگیہ کی کار کا شیشہ بھی ٹوٹ گیا۔ وہ بال بال بچے۔ دونوں رہنما پارٹی کارکنوں کے اجلاس سے خطاب کے لیے جنوبی 24 پرگنہ جا رہے تھے۔
