محمڈن اسپورٹنگ اور ریئل کشمیر ایف سی کل کے میچ میں تین پوائنٹ حاصل کر کے ٹاپ فائیو میں اپنی اپنی جگہ مستحکم کرنے کے ارادے سے میدان میں اتریں گی۔
محمڈن اسپورٹنگ کے کوچ شنکر لال چکرورتی نے نامہ نگاروں سے گفتگو کرتے ہوئے کہا کہ پلے آف راؤنڈ کے چند میچوں میں شکست کے سبب خطابی دوڑ سے باہر ہونا پڑا۔
انہوں نے کہا کہ ہماری ٹیم اچھی ہے۔ کھلاڑیوں نے توقع کے مطابق کھیل کا مظاہرہ کیا لیکن قسمت ہمارے ساتھ نہیں تھی۔
محمڈن اسپورٹنگ کے کوچ نے کہا کہ پلے آف راؤنڈ کے آخری میچ میں بلند حوصلوں کے ساتھ میدان میں اتریں گے اور تین پوائنٹ حاصل کر کے تشفی بخش مقام حاصل کرنے کی کوشش کریں گے۔
دوسری طرف مہمان ٹیم ریئل کشمیر ایف سی کے گول کیپر کوچ جوناتھن کریگ کا کہنا ہے کہ رواں لیگ میں ہماری شروعات اچھی رہی تھی لیکن چند میچوں میں پوائنٹ ضائع ہونے کے سبب خطابی دوڑ سے باہر ہونا پڑا۔
مغربی بنگال کے ندیا ضلع میں واقع کلیانی میونسپل اسٹیڈیم میں میزبان ٹیم محمڈن اسپورٹنگ اور ریئل کشمیر ایف سی کی ٹیمیں آئی لیگ پلے آف آخری میچ میں آمنے سامنے ہوں گی۔
انہوں نے مزید کہا کہ کل کے میچ میں جیت درج کریں گے اور تین پوائنٹ کی بدولت تشفی بخش مقام حاصل کریں گے۔ ہمارے پاس معیاری کھلاڑی ہیں جو ہمیں جیت دلائیں گے۔
واضح رہے کہ لیگ ٹیبل میں محمڈن اسپورٹنگ 14 میچوں میں 20 پوائنٹ کے ساتھ پانچویں پوزیشن پر ہے۔
