وزیرا علیٰ ممتا بنرجی نے جعلی ویکسی نیشن کیمپ کے ذریعہ 2ہزار افراد کو نمونیہ کا انجیکشن دئیے جانے کے معاملے کا سخت نوٹس لیتے ہوئے کلکتہ پولس کمشنر سومن مترا کو جعلی آئی اے ایس افسر دیبانجن دیب کے خلاف مجرمانہ قتل کے دفعات لگانے کی ہدایت دی ہے ۔
وزیرا علیٰ ممتا بنرجی کے دفتر کے ذرائع کے مطابق ممتابنرجی نے کلکتہ پولس کمشنر سومن مترا کو فون کرکے اس پورے معاملے سے متعلق انکوائری کرنے کے بعد اس معاملے میں درج ایف آئی آر میں مجرمانہ قتل کا دفعہ 304 کو لگانے کی ہدایت دی ہے۔ تاہم ، اس معاملے میں مجموعی طور پر 10 ایف آئی آر درج کی گئی ہیں اورکلکتہ پولس کی انٹلیجنس ٹیم (ڈی ڈی) اس معاملے کی تحقیقات کر رہی ہے۔
ذرائع کے مطابق ممتا بنرجی نے فون پر برہمی کا اظہار کرے ہوئے کہا کہ اس آدمی نے بہت ہی غلط کام کیا ہے۔ ایسے شخص کو سڑک پر کھڑا کرکے 5000 جوتے مارنے کی ضرورت ہے۔ ممتا بنرجی نے سومن مترا کو ہدایت دی ہے کہ اس معاملے میں ایسی کارروائی ہونی چاہیے کہ آئندہ کوئی ایسی حرکت کرنے کی جرأت نہ کرے ۔اس کے بعد ہی کلکتہ پولس کمشنر نے افسران کو ہدایت دی جلد سے کارروائی میں تیزی لائ۔
یہ بھی پڑھیں: بنگال میں ضمنی انتخابات جلد از جلد کرانے کی اپیل
کلکتہ پولیس کے جوائنٹ کمشنر (کرائم) آئی پی ایس مرلی دھرشرما نے ویڈیو کانفرنس کے ذریعے بتایا کہ ڈی سی ڈی ڈی ساکت گھوش کی سربراہی میں خصوصی تحقیقاتی ٹیم (ایس آئی ٹی) تشکیل دی گئی ہے۔ ممتا بنرجی نےاس کے علاوہ محکمہ صحت کے سکریٹری نگم شکل نارائن کو خصوصی ہدایات بھی دی ہے۔ بنرجی نے ان سے فون پر بات کی ہے اور کہا ہے کہ جعلی ویکسی نیشن کیمپوں میں ویکسین کے نام پر انجیکشن لگانے والے لوگوں کی صحت کی فوری جانچ کی جائے۔ اس کے لئے محکمہ صحت نے ایک کمیٹی بھی تشکیل دی ہے۔ صحت کمیٹی نے ایسے لوگوں کی صحت کی جانچ شروع کردی ہے۔ پولیس کو شبہ ہے کہ اس معاملے میں ایک بڑا گروہ کام کر رہا تھا جس میں میونسپل کارپوریشن کے نچلے درجے کے عہدیدار بھی شامل ہوسکتے ہیں۔ دیونجن سے مسلسل پوچھ گچھ کی جارہی ہے۔
دوسری جانب جعلی ویکسی نیشن کے بعد ترنمول کانگریس کی ممبر پارلیمنٹ و ادکارہ میمی چکرورتی کی آج طبیعت خراب ہونے کے بعد انہوں نے ڈاکٹرسے رجوع کیا ہے۔میمی چکرورتی نے ہی سب سے پہلے جعلی ویکسی نیشن کا پھانڈا پھوڑا ہے۔
یو این آئی
