مغربی بنگال کی وزیر اعلیٰ ممتا بنرجی نے کانگریس کی کارگزار صدر سونیا گاندھی کی طلب کردہ اپوزیشن جماعتوں کی ورچوول میٹنگ میں شرکت کرنے کا فیصلہ کیا ہے۔
ترنمول کانگریس کے ذرائع نے اس کی تصدیق کرتے ہوئےکہا کہ 30 اگست کو سونیا گاندھی نے اپوزیشن کی ورچوول میٹنگ بلائی ہے، جس میں ممتا بنرجی کو شرکت کی دعوت دی گئی تھی۔ بنرجی نے دعوت قبول کرلی ہے۔
ممتا بنرجی سمیت کئی اپوزیشن جماعتوں کے قائدین کو اجلاس میں شرکت کی دعوت دی گئی ہے۔ اسمبلی انتخابات کے بعد پہلی مرتبہ دہلی کا دورہ کرنے والی ممتا بنرجی نے کانگریس صدر سونیا گاندھی سے ملاقات کی تھی۔
مزید پڑھیں: مودی کی صدارت میں افغانستان پر اعلیٰ سطحی اجلاس
انہوں نے کانگریس کے سینئر لیڈر کمل ناتھ سمیت دیگر رہنماؤں سے بھی ملاقات کی تھی۔ دونوں رہنماؤں نے مل کر کام کرنے پر اتفاق کیا تھا۔ جھارکھنڈ کے وزیراعلیٰ ہیمنت سورین نے بھی میٹنگ میں شرکت پر رضامندی ظاہر کی ہے۔ اس سلسلے میں کانگریس کے سینئر لیڈر کپل سبل نے اپوزیشن جماعتوں کے قائدین کے ساتھ ان کی رہائش گاہ پر ملاقات کی ہے۔
واضح رہے کہ 2024 کے لوک سبھا انتخابات سے قبل ملک بھر میں ہم خیال جماعتوں کو متحد کرنے کی کوششیں جاری ہیں، جس میں ممتا بنرجی ایک اہم چہرے کے طور پر سامنے آئی ہیں۔
