ریاست مغربی بنگال کے شمالی ضلع 24پرگنہ کے صنعتی خطہ بیرکپور میں آج صبح ساڑھے نو بجے بائیں محاذ اور کانگریس کے کارکنان کسانوں کے بھارت بند کو کامیاب بنانے کے لیے سڑکوں پر اترے۔
واضح رہے کہ شیام نگر سٹیشن کے قریب ریلوے پٹری پر دھرنے پر بیٹھ گئے جس کے سبب آدھا گھنٹے تک لوکل ٹرین خدمات معطل رہی۔
بند حامیوں نے سڑک کی بھی ناکہ بندی کردی جس سے آمد و رفت پوری طرح سے متاثر ہوگئی تاہم مختلف مقامات پر کانگریس اور بائیں محاذ کے حامیوں نے احتجاج بھی کیا۔
کانگریس اور بائیں محاذ کی بھارت بند کو کامیاب بنانے کی کوشش میں عام لوگ بھی شامل تھے۔
سیاسی جماعتوں سے زیادہ عام لوگ بی جے پی کی قیادت والی مرکزی حکومت کے خلاف نعرہ بازی کرتے ہوئے نظر آئے۔
کانگریس اور بائیں محاذ کی جانب سے مشترکہ کسانوں کی حمایت میں جلوس بھی نکالے گئے جسے عوام کی بھی حمایت حاصل رہی۔
بائیں محاذ کے نوشاد انور نے کہا کہ یہ پارٹی یا سیاست کی بات نہیں ہے بلکہ عام لوگوں کی پریشانیوں سے دوچار ہونے کا مسئلہ ہے۔
انہوں نے کہا کہ ہر آدمی یہ کہہ رہا ہے کہ یہ تو کسانوں کا مسئلہ ہے لیکن حقیقت میں عام لوگ اس سے بری طرح سے متاثر ہوں گے جب کسانوں کو کاروبار میں نقصان ہوگا تو اس کا خمیازہ عام لوگوں کو بھی بھگتنا پڑسکتا ہے۔
واضح رہے کہ دہلی میں کسان بل کے خلاف دھرنے پر بیٹھے کسانوں نے بھارت بند کا اعلان کیا ہے۔
مغربی بنگال کی حکمراں جماعت ترنمول کانگریس نے اخلاقی طور پر بند کی حمایت کا فیصلہ کیا۔
کانگریس، بائیں محاذ اور اس کی 16 حلیف جماعتوں، کولکاتا میڈیکل کالج اینڈ ہسپتال کے طالبات سمیت درجنوں تنظینوں نے بھارت بند کو کامیاب بنانے کے لیے سڑکوں پر اترنے کا اعلان پہلے ہی کردیا تھا۔
