مغربی بنگال کے مدنی پور ضلع کے ہلدیہ میں عوامی جلسے سے خطاب کرتے ہوئے وزیراعظم نریندر مودی نے کسانوں کی حمایت میں ٹویٹ کرنے والوں کے معاملے میں خاموشی توڑی۔
وزیراعظم نے کہا کہ 'احتجاج کے نام پر ملک کو بدنام کرنے کی سازش کرنے والوں کو کسی بھی قیمت پر بخشا نہیں جائے گا۔'
انہوں نے کہا کہ 'یہ ہمارا اندرونی معاملہ ہے اور اسے ہم اپنے ہی طریقے سے نمٹیں گے اور اس کا حل نکالیں گے۔ اس معاملے میں بیرونی لوگوں کے کچھ بھی کہنے کا مطلب ہمارے اندرونی معاملات میں مداخلت سمجھا جائے گا۔'
دوران خطاب وزیراعظم نریندر مودی نے ملک کی موجودہ صورتحال پر وزیراعلیٰ ممتا بنرجی کی خاموشی پر بھی سوال اٹھائے۔
مودی نے کہا کہ ممتا بنرجی ہر معاملے میں سب سے پہلے آواز بلند کرتی ہیں لیکن ملک کی موجودہ صورتحال پر خاموش کیوں ہیں؟ کیا وہ بھی ان لوگوں کی حمایت کرتی ہیں۔
واضح رہے کہ گزشتہ دو ہفتوں کے دوران وزیراعظم نریندر مودی دوسری مرتبہ مغربی بنگال کے دورے پر آئے ہیں۔
نریندر مودی نے مغربی بنگال اسمبلی انتخابات کے پیش نظر پہلی مرتبہ مدنی پور ضلع کے ہلدیہ میں عوامی جلسے کو خطاب کیا۔
