مغربی بنگال میں منعقد ہونے والے اسمبلی انتخابات 2021 کے دوسرے مرحلے کی پولنگ سے قبل شمالی 24 پرگنہ میں بڑے پیمانے چھاپہ ماری مہم چلائی جا رہی ہے۔ نئی ہٹی تھانے کی پولیس نے خفیہ اطلاع کی بنیاد پر آم ڈانگہ اور کلیانی ایکسپریس کے درمیان خصوصی چھاپہ ماری کے دوران ہتھیار بنانے کے غیر قانونی کارخانے کا پردہ فاش کیا۔
پولیس کی چھاپہ ماری مہم کے دوران پولیس نے کثیر تعداد میں ہتھیار ضبط کئے ہیں اور اس معاملے میں دو لوگوں کی گرفتاری عمل میں آئی ہے۔ ان سے پوچھ گچھ جاری ہے۔
سینئر پولیس اہلکار امر آتھ کا کہنا ہے کہ مخبروں کی اطلاع کی بنیاد پر آم ڈانگہ اور کلیانی ایکسپریس وے پر ایک کارخانے میں چھاپہ ماری مہم چلائی گئی۔
انہوں نے کہا کہ چھاپہ ماری مہم کے دوران بندوق، پستول، ایک سو دس راؤنڈ کارتوس اور ہتھیار بنانے کے سامان برآمد کئے گئے ہیں۔
پولیس اہلکار نے مزید بتایا کہ اس معاملے میں شہراب خان اور علی حسین نام کے دو لوگوں کی گرفتاری عمل میں آئی ہے۔ ان سے پوچھ گچھ کی جا رہی ہے۔
مزید پڑھیں:
مغربی بنگال: دوسرے مرحلے کی پولنگ کل، ممتا بنرجی سمیت 171 امیدوار میدان میں
واضح رہے کہ انتخابی کمیشن نے مغربی بنگال اسمبلی انتخابات 2021 سے پہلے ہی شمالی 24 پرگنہ ضلع کو حساس قرار دے رکھا ہے۔ انتخابی کمیشن کی ہدایت پر ضلع میں بڑے پیمانے پر چھاپہ ماری مہم چلائی جا رہی ہے۔
