مغربی بنگال کے بردوان ضلع کے درگاپور بیریج سے سینکڑوں کیوسک پانی چھوڑے جانے کے سبب پانچ اضلاع بردوان، مشرقی مدنی پور، پرولیا، ہگلی اور ہوڑہ ضلع میں سیلابی صورتحال مزید سنگین ہوگئی ہے۔
درگاپور بیراج سے پانی چھوڑے جانے کے سبب بردوان سمیت مختلف اضلاع میں ندی کے پانی متعدد علاقوں میں جمع ہونے کی وجہ سے لوگ اسکولوں میں پناہ لینے پر مجبور ہیں۔ اس دوران ڈی وی سی کے ذریعہ پانی چھوڑے جانے کے سبب پانی کی سطح میں تشویشناک طور پر اضافہ ہوگیا ہے۔ اس کی وجہ سے پانچ اضلاع میں سیلاب جیسی صورتحال ہے۔ ذرائع کے مطابق مختلف اضلاع کے بیشتر علاقے غرق آب ہیں۔ غرقاب علاقوں کے باشندوں کو عرضی رہائشی کیمپ میں منتقل کیا گیا ہے۔ اس دوران قومی شاہراہ کے کنارے لوگوں کو کیمپ میں رکھا گیا ہے۔ ریاستی حکومت نے مانا کہ مشرقی مدنی پور اور ہگلی کے حالات خراب ہیں۔ ان اضلاع میں سیلاب جیسی صورتحال پر قابو پانے کی ہر ممکن کوشش کی جارہی ہے۔ متاثرہ علاقوں میں راحت پیکج تقسیم کی جارہی ہے۔
واضح رہے کہ مغربی بنگال میں سیلابی صورتحال سنگین ہونے پر وزیراعلیٰ ممتا بنرجی نے ڈی وی سی کی سازش قرار دیا ہے۔ وزیراعلیٰ نے وزیراعظم نریندر مودی کو خط لکھ کر ڈی وی سی سے ریاست میں پانی نہ چھوڑنے کا مطالبہ کیا ہے۔
