ترنمول کانگریس کی سربراہ ممتا بنرجی کے نندی گرام سے انتخابات لڑنے کے اعلان کے بعد سے ہی مغربی بنگال کی سیاست سرگرم ہے۔
کانگریس اور لفٹ فرنٹ نے ممتا بنرجی کے نندی گرام سے انتخاب لڑنے کے اعلان پر زبردست نکتہ چینی کی۔
اس دوران اسمبلی میں لفٹ فرنٹ کے رہنما سوجن چکرورتی نے کہا کہ 'ممتابنرجی کی غلط بیانی سے بی جے پی کو بھر پور فائدہ پہنچنے لگا ہے۔
اس مرتبہ بھی انہوں نے ویسا ہی بیان بازی کی جس کی امید کی جا رہی تھی۔ انہوں نے کہا کہ نندی گرام سے انتخاب لڑنے کا فیصلہ بھوانی پور میں شکست سے بچنے کی وجہ سے لیا گیا۔ حالانکہ ممتا بنرجی کو خود کے بجائے شہید کی ماں فیروزہ بی بی کو نندی گرام سے امیدوار بنانا چاہئے۔
انہوں نے کہا کہ 'گزشتہ اسمبلی انتخابات میں شھبندو ادھیکاری کی وجہ سے فیروزہ بی بی امیدوار نہیں بن سکی تھی لیکن اس مرتبہ کوئی نہیں ہے پھر انہیں کیوں نہیں امیدوار بنایا گیا۔
سی پی آئی ایم کے رہنما سوجن چکرورتی نے کہا کہ سچائی یہ ہے کہ مغربی بنگال میں اسمبلی انتخابات سے قبل حکمراں جماعت ترنمول کانگریس کی حالت انتہائی خراب ہو گئی ہے۔
انہوں نے کہا کہ ممتابنرجی نے جس پارٹی کو ہاتھ پکڑ کر لال جھنڈے کو ختم کرنے کے لئے لائی تھی آج وہی گلے کی ہڈی بن چکی ہے۔
