مغربی بنگال بی جے پی اکائی کے صدر دلیپ گھوش کا متنازع بیانوں سے پرانا ناطہ ہے۔ وہ اکثر و بیشتر متنازع بیانات دے کر سیاسی درجہء حرارت کو گرما رہتے ہیں۔ بی جے پی لیڈر نے ایک بار پھر متنازع بیان دیتے ہوئے کہا کہ میرے پاس ایک لال ڈائری ہے جس میں اس بات کا ذکر ہے کہ کس سے کس طرح بدلا لینا ہے۔
انہوں نے اپنے سیاسی حریفوں کے خلاف قابل اعتراض بیان دیتے ہوئے کہا کہ میری ڈائری میں آنکھ کے بدلے آنکھ، زبان کے بدلے زبان، مار کے بدلے مار اور بے عزتی کے بدلے بے عزتی کی بات لکھی ہوئی ہے۔ اسی کے ساتھ بی جے پی کے ریاستی صدر نے اس متنازع بیان کا دفاع کرتے ہوئے کہا کہ یہ سب عام بات ہے۔ اس پر کسی کو کوئی اعتراض نہیں ہونا چاہئے اور وہ یہ بیان اس لیے دے رہے ہیں کہ جس نے ایسے حالات کا سامنا کیا ہے، اس کو بھی کبھی نہ کبھی موقع ملتا ہے۔
دلیپ گھوش نے فیس بک پر ایک پوسٹ میں لکھا کہ ریاست میں اقتدار کی تبدیلی اب عنقریب ہوگی۔ اس کے بعد ایک نئی سیاست کی شروعات ہوگی جس میں بدعنوان لوگوں کے لئے کوئی جگہ نہیں ہو گی۔
مزید پڑھیں:
'مغربی بنگال میں پرتشدد سیاست نہیں چل سکتا'
وہیں، ترنمول کانگریس کے سابق رکن پارلیمان کنال گھوش نے کہا کہ بی جے پی کے ریاستی صدر جس ڈائری کا ذکر کرتے ہیں اس کی کوئی اہمیت نہیں ہے۔ انہوں نے بی جے پی کے داخلی اختلاف پر نشانہ لگاتے ہوئے کہا کہ دلیپ گھوش نے اپنے ڈائری میں مغربی بنگال بی جے پی کے مکل رائے اور کیلاش وجے ورگھیہ گروپ میں تقسیم ہونے کے بارے میں کیا لکھا ہے، اس کے بارے میں انہوں نے کچھ نہیں بتایا۔ اسی کے ساتھ کانگریس اور بائیں محاذ کے لیڈروں نے بھی بی جے پی کے ریاستی صدر دلیپ گھوش کے متنازع بیان پر شدید تنقید کی ہے۔
