بھوانی پور سے ممتا بنرجی کے خلاف امیدوار اتارنے کو لیکر پردیش کانگریس پہلے سے ہی تذبذب کا شکار تھی۔ پارٹی کے کچھ لوگ امیدوار اتارنے کے حق میں تھے۔ جب کہ ایک گروہ اس کے حق میں نہیں تھا۔ ادھیر چودھری نے آج اس سلسلے میں کہا کہ پردیش کانگریس کے صدر کے طور پر میں چاہتا تھا کہ اس کا فیصلہ پارٹی کی دہلی اعلیٰ قیادت کریں۔
آل انڈیا کانگریس کمیٹی کی طرف سے یہ اعلان کیا گیا ہے کہ ضمنی انتخابات میں بھوانی پور سے ممتا بنرجی کے خلاف کانگریس کا کوئی امیدوار نہیں ہوگا۔ ادھیر چودھری نے مزید کہا کہ آل انڈیا کانگریس کا موقف ہے کہ ممتا بنرجی کے خلاف امیدوار کھڑا کرکے ہم بی جے پی کے لیے آسانی پیدا نہیں کرنا چاہتے ہیں'۔
اس سلسلے میں ترنمول کانگریس کے رہنما سوکھیندو شیکھر رائے کا کہنا ہے کہ ممتا بنرجی پہلے بھی اس سیٹ سے مقابلہ کر چکی ہے۔ اس بار بھی یہاں سے الیکشن لڑ رہی ہیں اور جیت بھی ان کی ہی ہوگی۔ ممتا کی جیت پو کوئی شک نہیں ہے۔ کانگریس کے امیدوار کھڑا نہ کرنے کے فیصلے کا ہم خیر مقدم کرتے ہیں۔ ہماری پارٹی کی سربراہ چاہتی ہیں کہ تمام اپوزیشن بی جے پی کے خلاف ایک ساتھ ملکر میدان میں اتریں'۔
- مزید پڑھیں: علاقائی جماعتوں کو متحد ہونے کی ضرورت: سلمان خورشید
- مغربی بنگال: ضمنی انتخابات کی تیاریاں و سرگرمیاں تیز
کانگریس کے امیدوار نہ کھڑا کرنے کا فیصلہ خود مستقبل کی سیاست کے لیے اہم سمجھا جارہا ہے۔ بی جے پی کے خلاف بننے والے محاذ کی طرف یہ ایک اشارہ سمجھا جارہا ہے۔ دہلی جاکر حال ہی میں ممتا بنرجی نے راہل گاندھی اور سونیا گاندھی سے ملاقات کی تھی۔
