کولکاتا: مغربی بنگال کی حکمراں جماعت ترنمول کانگریس کی سربراہ اور وزیر اعلی ممتابنرجی نے مرکزی حکومت کے امتیازی سلوک کے خلاف دوسرے دن بھی دھرنا جاری رکھا۔ دھرنے کے دوسرے دن اسٹیج پر لوگوں کی بھیڑ میں غیر معمولی اضافہ ہوا ہے۔ دھرنے کے دوسرے دن ترنمول کانگریس کی سربراہ ممتابنرجی نے کہا کہ 2024 کے عام انتخابات بھارت کے لیے اہم ثابت ہو سکتے ہیں۔ اب پتہ چلے گا کہ بی جے پی کی قیادت والی مرکزی حکومت نے گذشتہ آٹھ نو برسوں کے دوران ملک اور یہاں کے عوام کے لیے کیا کیا۔
انہوں نے کہاکہ 2024 میں عام انتخابات میں بی جے پی کی شکست یقینی ہے لیکن اس کے لیے عام لوگوں کو بیدار ہونے کی ضرورت ہے۔ لوگوں کو سمجھنے کی ضرورت ہے کہ مرکزی حکومت نے عام لوگوں کے لیے کیا کیا ہے۔ عام لوگوں کو گذشتہ آٹھ برسوں میں سب سے زیادہ پریشانیوں کا سامنا کرنا پڑا ہے۔
