کلکتہ یونیورسٹی انتظامیہ نے فائنل ایئر کے امتحانات کے سلسلے میں بدھ کے روز میٹنگ کی جس کے بعد اس بار فائنل ایئر کے امتحانات آن لائن کرانے کا فیصلہ کیا گیا ہے۔
گریجویشن کے طلبہ کو کالج کے اساتذہ سوالنامہ ارسال کریں گے۔ جس کا جواب طلبہ لکھ کر اس کی اسکین کاپی اساتذہ کو بھیجیں گے۔
یکم اکتوبر سے 16 اکتوبر تک گریجویشن اور ایم اے فائنل ایئر کے امتحانات ہوں گے۔ تمام مضامین کے لئے اسی طرح سے امتحانات ہوں گے اور سوالنامہ حل کرنے کے لئے 24 گھنٹے کا وقت دیا جائے گا۔
امتحانات کی پوری تفصیل یونیورسٹی کے ذریعے اعلان کیا جائے گا۔ چونکہ پہلے ہی بہت تاخیر ہو چکی ہے اسی لیے اس بار جوابی پرچے کی جانچ متعلقہ کالج کے اساتذہ ہی کریں گے۔ اب تک یہ اصول تھا کہ پرچے کی جانچ دوسرے کالج کے اساتذہ کرتے تھے لیکن اس بار ایسا نہیں ہوگا۔
کلکتہ یونیورسٹی کی وی سی سونالی چکرورتی بندھو اپادھیائے نے بتایا کہ موجودہ صورت حال میں طلبہ کا کالج میں آکر امتحان دینا ممکن نہیں ہے۔ اسی لئے متبادل طریقہ کار کا استعمال کیا جا رہا ہے۔
کب کس مضمون کا امتحان ہوگا اس سلسلے میں تفصیلی جانکاری یونیورسٹی کی جانب دی جائے گی۔ سپریم کورٹ کے فیصلے کے بعد وزیر تعلیم پارتھو چٹرجی نے تمام یونیورسٹیوں کے وی سی کے ساتھ ورچوئل میٹنگ کی۔ جس میں امتحانات کرانے کے متعلق تبادلہ خیال کیا گیا۔ جس میں ستمبر کے بجائے اکتوبر میں امتحانات کرانے اور اکتوبر میں ہی نتائج شائع کرنے ہوں گے۔
کلکتہ یونیورسٹی کی وی سی سونالی چکرورتی بندھو اپادھیائے نے بتایا کہ بی اے، بی ایس سی اور بی کام کے لئے گزشتہ سال کے سوالنامہ کا ہی فائنل ائیر کے امتحانات میں استعمال کیا جائے گا۔ جبکہ انڈر گریجویٹ کے لئے جہاں تک نصاب مکمل ہوا ہے اسی کے مطابق سوالنامہ تیار کیا جائے گا۔
