مغربی بنگال کے شمالی 24 پرگنہ کے بیرکپور سے بی جے پی کے رکن پارلیمان ارجن سنگھ نے حکمراں جماعت ترنمول کانگریس پر انہیں جان مارنے کی سازش کا الزام عائد کیا ہے۔
بی جے پی کے رکن پارلیمان ارجن سنگھ نے کہا کہ گزشتہ دو مئی کو اسمبلی انتخابات کے نتائج آنے کے بعد سے میرے اوپر مُسلسل جان لیوا حملے کئے جا رہے ہیں۔ اوپر والے کی بڑی مہربانی ہے کہ میں اب تک زندہ ہوں. رکن پارلیمان کا کہنا ہے کہ سیاسی انتقام کے تحت ترنمول کانگریس کے حامیوں کی جانب سے مجھے جان سے مارنے کی سازشیں کی جا رہی ہے۔
انہوں نے کہا کہ اسی سازش کے تحت میرے اوپر مسلسل حملے کئے جا رہے ہیں۔پولیس کو سب بتا چکا ہوں۔ اس کے باوجود پولیس تماشائی بنی ہوئی ہے۔ حملے میں ملوث شرپسند آزاد گھومتے ہیں۔ ان کے خلاف کوئی کارروائی نہیں کی جاتی ہے۔
دوسری طرف ترنمول کانگریس کے رہنما نے بی جے پی کے رکن پارلیمان ارجن سنگھ کے الزام کو بے بنیاد اور بکواس قرار دیا ہے۔
مغربی بنگال میں اسمبلی انتخابات 2021 کے نتائج کے بعد سے اب تک سیاسی جماعتوں کے حامیوں کے درمیان خونی جھڑپوں کا سلسلہ جاری ہے.ریاستی حکومت کی تمام تر کوششوں کے باوجود سیاسی جماعتوں کے حامیوں کے درمیان خونی جھڑپوں کا سلسلہ رکنے کا نام نہیں لے رہی ہے۔
شمالی 24 پرگنہ کے بیرکپور پارلیمانی حلقے میں اسمبلی انتخابات 2021 کے نتائج کے بعد سے ہی سیاسی جماعتوں کے حامیوں کے درمیان خونی جھڑپوں کا سلسلہ جاری ہے. چند دنوں قبل وزارت داخلہ کے وفد نے اس علاقے کا دورہ کیا تھا۔
