مغربی بنگال میں منعقد ہونے والے اسمبلی انتخابات کے پیش نظر دوسری ریاستوں سے تعلق رکھنے والے سیاسی رہنماؤں کے بنگال آنے کا سلسلہ جاری ہے۔ کانگریس کے رکن پارلیمان اور مالدہ ضلع کے مشیر جاوید خان ان دنوں مغربی بنگال کے دورے پر آئے ہوئے ہیں۔ رکن پارلیمان جاوید خان نے مالدہ ضلع کانگریس کے اعلیٰ رہنماؤں ابو حسن خان چودھری، عیشا علی خان چودھری اور مشتاق عالم سمیت دیگر رہنماؤں سے ملاقات کی۔
اس موقع پر کانگریس کے رکن پارلیمان جاوید خان نے نامہ نگاروں سے گفتگو کرتے ہوئے کہا کہ اسمبلی انتخابات میں بی جے پی کوئی فیکٹر نہیں ہے۔ تین مہینے میں اس کا سارا بھرم ٹوٹے گا اور تماشا ختم ہو جائے گا۔ مغربی بنگال میں بی جے پی کچھ چلنے والی نہیں ہے۔ صرف انتخابی سرگرمیوں کے سبب ان کے جلسے و جلوس میں بھیڑ لگ رہی ہے۔
انہوں نے کہا کہ مغربی بنگال کے عوام کانگریس کی طرف ایک بار پھر امید کی نظروں سے دیکھ رہے ہیں اور ہم اسمبلی انتخابات میں بہتر کارکردگی کا مظاہرہ کریں گے۔ کانگریس کے رکن پارلیمان جاوید خان نے کہا کہ اسمبلی انتخابات میں بی جے پی کچھ بھی نہیں کر سکتی ہے۔ جتنے بڑے بڑے لوگ آرہے ہیں، وہ یوں ہی آئیں گے اور چلے جائیں گے۔ انہوں نے کہا کہ بنگال کے عوام کو ان رہنماؤں سے کوئی لینا دینا نہیں ہے۔ ریاست کے عوام اپنی مرضی سے کام کرتے ہیں اور مستقبل میں بھی کریں گے۔
