وزیراعظم نے ریاستی حکومت اور فوج کے افسران سے کہا ہے کہ وہ فوجیوں کے ساتھ ہم آہنگی اور ہمدردی کے سلوک کو یقینی بنائیں۔
اتراکھنڈ کے چیف منسٹر آفس کے مطابق وزیراعظم نے سی ایم تریویندر سنگھ راوت سے فون پر بات کی اور کورونا سے متاثر فوجی جوانوں کے بارے میں معلومات حاصل کی۔
وزیراعظم نے ریاستی حکومت اور فوجی عہدیداروں پر زور دیا کہ وہ کورونا متاثر فوجیوں کے بہتر علاج کو یقینی بنائیں۔ اس موقع پر وزیراعلیٰ نے کہا کہ فوج سے باقاعدہ طور پر رابطہ قائم کیا گیا ہے اور ضروری سہولیات کو فراہم کیا جارہا ہے۔
تریویندر سنگھ راوت نے کہا کہ ریاست میں کورونا کے مثبت معاملات میں تیزی سے اضافہ ہو رہا ہے لیکن صورتحال قابو میں ہے اور ریاستی حکومت جانچ کے عمل میں تیزی لارہی ہے۔ انہوں نے کہا کہ آئی سی یو، وینٹیلیٹر اور آکسیجن سے متعلق سہولیات میں مسلسل اضافہ کیا جارہا ہے۔
وزیراعظم نریندر مودی نے بارش کے پیش نظر ریاست میں ڈیزاسٹر منیجمنٹ پر خصوصی توجہ دینے پر بھی زور دیا۔ انہوں نے مرکزی حکومت کی جانب سے ریاست کو مناسب تعاون فراہم کرنے کا بھی تیقن دیا۔
