اتر پردیش کے بارہ بنکی شہر کی جامع مسجد میں کورونا کرفیو کے دوران تراویح کا عمل مکمل کرنے کے لئے نیا طریقہ اختیار کیا گیا ہے۔ اس نئے طریقے سے تراویح میں قرآن بھی مکمل ہوگا اور کووڈ-19 کی گائیڈ لائین پر بھی مکمل طور سے عمل کیا جا سکے گا۔ منگل کے روز سے یہاں اس نئے طریقے سے تراویح کا آغاز کیا جائے گا۔
بارہ بنکی شہر کی جامعہ مسجد کے متولی اور عیدگاہ کمیٹی کے چئیرمین عمیر قدوائی نے بتایا کہ تراویح سنت ہے، اس میں 20 رکعت نماز فرض ہیں۔ شہر میں کورونا کے پیش نظر نائیٹ کرفیو نافذ ہے۔ ایسے میں ہم بہت جلدی کر کے بھی 20 رکعت نماز 9 بجے تک مکمل نہیں کر سکتے ہیں. اس لئے تمام ذمہ داران اور امام نے طئے کیا ہے کہ تراویح میں ایک سپارہ 10 رکعت میں مکمل کر لیا جائے گا۔ جو تقریباً پونے نو بجے تک مکمل ہوگا۔ 15 منٹ کا وقفہ نمازیوں کو گھر جانے کے لئے دیا جائے گا. جس سے وہ کرفیو کا وقت شروع ہونے سے قبل گھر پہنچ سکیں گے۔ باقی کی 10 رکعات اور وتر کی نماز سب لوگ گھر پر پڑھیں گے۔
انہوں نے کہا کہ ہم چاہ کر بھی مسجد میں 9 بجے کے درمیان 2 پارے کی تراویح مکمل نہیں کرا سکتے ہیں. اس لئے یہ فیصلہ لیا گیا ہے. جس سے تراویح بھی ہو سکے گی اور کووڈ-19 کی گائیڈ لائین پر بھی عمل ہو سکے گا۔
