ریاست اتراکھنڈ حکومت کی خصوصی کوششوں سے كووڈ -19 لاک ڈاؤن کی وجہ پھنسے ہوئے 1200 مسافروں کو گجرات کے سورت سے لے کر ایک اسپیش ٹرین پیر کی شب 11 بجکر 30 منٹ پر كاٹھ گودام پہنچی جہاں وزیر اعلی کی جانب سے بھارتیہ جنتا پارٹی (بی جے پی) کے مقامی رہنماوں نے ان کا استقبال کیا۔
اپنے گھر واپس آنے والے ان مسافروں پر کئی کے چہروں پر اطمینان اور کچھ کی آنکھوں میں خوشی کے آنسو بھی نظر آئے۔ سینئر پولیس سپرنٹنڈنٹ (ایس ایس پی) پرہلاد سنگھ مینا نے مسافروں کو سماجی فاصلے کو برقرار رکھتے ہوئے قطار بند کرایا۔
واضح ر ہے کہ سورت سے آئی اس اسپیشل ٹرین میں کل 1200 مسافر یہاں آئے ہیں جن میں ضلع الموڑا کے 123، باگیشور کے 291، چمپاوت کے 6، پتھوراگڈھ کے 254، ادھم سنگھ نگر کے 16 اور نینی تال ضلع کے 510 مسافر شامل تھے۔ رات میں ہی سب کی صحت کی جانچ کرکے مقرر بسوں کے ذریعے مختلف اضلاع میں روانہ کیا گیا۔
