یزید کے پیروکار ہی اصل شدت پسند ہیں: مولانا کلب جواد

پاکستان میں جس طرح سے یزید کے پیروکاروں نے اس کے حق میں آواز بلند کی ہے وہ سب 'شدت پسند' ہیں۔ ایسے لوگوں اور تنظیموں کی پشت پناہی پاکستانی حکومت کر رہی ہے۔ ان خیالات کا اظہار شیعہ عالم دین مولانا کلب جواد نے کیا ہے۔

مولانا کلب جواد نے امام باڑا غفران مآب میں پریس کانفرنس میں صحافیوں سے بات چیت کے دوران کہا کہ 'پاکستان میں جس طرح شیعہ دشمنی میں یزید نوازی کو فروغ حاصل ہو رہا ہے یہ سلسلہ ایک دن پاکستان کو یزیدستان میں تبدیل کر دے گا۔

کچھ روز قبل پاکستان میں حضرت امام حسینؓ کے قاتل یزید کو نعوذ باللہ 'رضی اللہ عنہ' اور 'امیر' کہا گیا۔ ساتھ ہی یزید زندہ باد کے نعروں کے علاوہ شیعہ کافر، شیعہ کافر کے نعرے لگا کر شیعوں کے قتل عام کی تیاریوں کا اعلان کیا گیا ہے۔

مولانا کلب جواد نے کہا کہ 'جلد ہی مرکزی دارالحکومت دہلی میں اسی طرح کا ایک اجلاس کریں گے جس میں اہل سنت جماعت کے علماء کو مدعو کریں گے۔ اس کے بعد شیعہ اور سنی علماء کرام مل کر پاکستانی سفارت خانے کا گھیراؤ کریں گے لیکن اس میں عام شہری شامل نہیں ہوں گے۔

شیعہ عالم دین نے مزید کہا کہ 'پاکستانی حکومت سعودی حکومت کے اشاروں پر ایسا کر رہی ہے۔ اس میں امریکہ اسرائیل اور سعودی عرب شامل ہیں۔

انہوں نے کہا کہ جس تنظیم نے یہ مجلس پاکستان میں منعقد کی تھی اس پر پہلے سے پابندی عائد ہے لیک اس کے باوجود پولیس کی موجودگی میں یزید امیر اور خلیفہ کہا گیا ساتھ ہی شیعہ مسلمانوں کو کافر قرار دیا گیا۔

مولانا کلب جواد نے کہا کہ 'شیعہ مسلمانوں نے ہمیشہ سے ہی ظلم کے خلاف آواز بلند کی ہے۔ یہی وجہ ہے کہ گزشتہ 20 تا 25 برسوں سے لاکھوں کی تعداد میں شیعہ مسلمانوں کو مختلف ممالک میں قتل کیا جا رہا ہے۔