ریاست اترپردیش میں ایک طویل مدت سے بنکر اپنے بجلی مسائل کو لے کر احتجاجی مظاہرہ کر رہے ہیں اس سلسلے میں ایک ستمبر کو ریاست گیر ہڑتال بھی ہوئی تھی، جس کے بعد حکومت نے سنجیدگی کا مظاہرہ کرتے ہوئے بنکروں کو 31 جولائی تک فلیٹ ریٹ پر بل جمع کرنے کی یقین دہانی کرائی تھی۔
ایک ماہ گزر جانے کے بعد حکومت کی جانب سے کوئی حکم نامہ جاری نہیں ہوا جس سے کبیدہ خاطر ہو کر بنکر دوبارہ ہڑتال کی تیاری کر رہے ہیں۔
اس سلسلے میں میں ای ٹی وی بھارت کے رپورٹر خورشید احمد نے لکھنؤ میں تعینات محکمہ ہینڈلوم کے اعلی افسر راما رمن سے فون پر گفتگو کر کے 31 جولائی تک فلیٹ ریٹ پر بجلی بل جمع کرنے کے بارے میں معلومات حاصل کی۔
راما رمن نے کہا کہ 31 جولائی تک فلیٹ ریٹ بجلی بل کے سلسلے میں حکومت پوری سنجیدگی کا مظاہرہ کر رہی ہے، اس سلسلے میں ایک ہفتے کا وقت درکار ہے یعنی آئندہ منگل تک بجلی محکمہ کو سرکار کا حکم نامہ پہنچ جائے گا جس کے بعد بنکر 31 جولائی تک فلیٹ ریٹ پر بجلی کا بل جمع کرسکیں گے۔
انہوں نے کہا کہ یہ کارروائی مسلسل جاری ہے، اس میں وقت لگ رہا ہے ایسے میں غیر اطمینانی کی کوئی بات نہیں ہے، بنکر صبر و تحمل کا مظاہرہ کریں اور آنے والے وقت میں جلد ہی حکم نامہ بھیج دیا جائے گا۔
انہوں نے کہا کہ اس سلسلے میں پوری تیاری ہو چکی ہے۔ کیبینٹ تک فائل جانے میں وقت لگ رہا ہے امید ہے کہ ایک ہفتے میں یہ کام مکمل ہو جائے گا۔
