وسیم رضوی کی ملک میں شیعہ سنی فساد کرانے کی کوشش: کشش وارثی

اترپردیش شیعہ وقف بورڈ کے سابق چیئرمین وسیم رضوی کی جانب سے نیا قرآن شریف لکھے جانے اور اس قرآن شریف کو وزیر اعظم نریندر مودی کو خط لکھ کر نئے قرآن شریف کو مدرسوں میں نافذ کرنے کے مطالبہ پر مسلمانوں میں سخت ناراضگی ہے۔ صوفی اسلامی بورڈ کے قومی صدر کشش وارثی نے کہا کہ اس طرح کا بیان دے کر رضوی ملک کے اندر مسلکی فساد کرانا چاہتے ہیں، سرکار اسے سخت سے سخت سزا دے۔

اترپردیش شیعہ وقف بورڈ کے سابق چیئرمین وسیم رضوی کی جانب سے نیا قرآن شریف لکھے جانے اور اس قرآن شریف کو وزیر اعظم نریندر مودی کو خط لکھ کر نئے قرآن شریف کو مدرسوں میں نافذ کرنے کی مانگ کے بعد لگاتار ملک بھر سے ردعمل آ رہے ہیں۔ اس سلسلے میں صوفی اسلامی بورڈ کے قومی سیکرٹری کشش وارثی نے ای ٹی وی بھارت اردو سے خاص بات چیت کرتے ہوئے کہا کہ وسیم رضوی اس طرح کی بیان بازی کر کے شیعہ اور سنی کے بیچ فساد کرانا چاہتے ہیں۔

مرحوم مولانا کلب صادق کا ذکر کرتے ہوئے کشش وارثی نے کہا کہ مولانا کلب صادق صاحب نے ہمیشہ شیعہ اور سنی کو ایک ساتھ لانے اور آپس میں اتحاد قائم کرنے پر زور دیا لیکن اس کامیابی کو ناکام بنانے کے لیے وسیم رضوی لگاتار اس طرح کی بیان بازی کر رہے ہیں۔ ہم وزیراعظم نریندر مودی سے گزارش کرتے ہیں کہ ایسے انسان کے اوپر این ایس اے لگایا جائے اور جیل کی سلاخوں کے پیچھے بھیجا جائے۔ انہوں نے مزید کہا کہ اتر پردیش شیعہ وقف کے الیکشن میں آخر کار وسیم رضوی کو اتنے ووٹ کہاں سے ملے اس معاملے کی بھی جانچ ہونی چاہیے۔