ریاست اتر پردیش کے بنارس کے مدن پورہ علاقے کے ساگراباد مسجد کے قریب واقع قبرستان کی دیوار گرنے سے دو افراد زخمی ہوگئے جبکہ متعدد گاڑیوں کو نقصان پہنچا ہے۔
اطلاعات کے مطابق دو زخمیوں میں سے عاشق علی کی حالت نازک بتائی جارہی ہے جن کو ایوشمان ہسپتال میں داخل کیا گیا ہے جبکہ توفیق کو مقامی ہسپتال میں داخل کیا گیا۔
موقع پر پولیس انتظامیہ بچاؤ و راحت رسانی کا کام کر رہی ہے۔ میونسپل کارپوریشن کی جانب سے جے سی بی کے ذریعہ ملبہ ہٹا یا جا رہا ہے۔
بنارس میں آج مانسون کی پہلی موسلا دھار بارش ہوئی جس کی وجہ سے متعدد علاقے زیر آب ہیں۔ وہیں، مدن پورہ علاقے میں یہ حادثہ پیش آیا ہے۔
مقامی لوگوں کے مطابق مدن پورہ علاقے میں اسمارٹ سٹی اسکیم کے تحت زیر زمیں سیور لائن کا کام ہوا تھا لیکن انتظامیہ کی لاپرواہی سے گلیوں کو درست نہیں کیا گیا۔
اب بارش میں پانی انہیں نشیب و فراز سے گھروں کی بنیاد میں داخل ہو رہا جس سے مکانات منہدم ہورہے ہیں۔
