دائیں بازو کی سیاسی جماعت بی جے پی نے اپنی سیاسی مہم میں متعدد بار آنجہانی سوامی ویویکانند کا ذکر کیا ہے اور ان سے وابستہ نشانیوں کو محفوظ کرنے کا وعدہ بھی کیا ہے۔ لیکن وزیراعظم نریندرمودی کے پالیمانی حلقہ بنارس کے اردلی بازار سے متصل گوپال ولا میں واقع ایک عمارت ہے جو کھنڈرات میں تبدیل ہے، کہا جاتا ہے کہ سوامی ویویکانند کی یادیں اس عمارت سے جڑی ہوئی ہیں۔
سوامی ویویکانند نے بنارس کے گوپال ولا میں تقریبا ڈیڑھ ماہ قیام کیا تھا تبھی سے بنارس کی عوام گوپال ولا سے عقیدت رکھتی ہے، لیکن حکومت اور انتظامیہ کی عدم توجہی کہ وجہ سے یہ عمارت انتہائی خستہ حال ہے جو کھنڈرات میں تبدیل ہونے کے بعد جواریوں اور شرابیوں کا اڈہ بن گئی ہے۔ اس کے علاوہ خنزیر و دیگر مویشیوں کی پناہ گاہ بھی یہ عمارت ہے۔
سماجی کارکن ایڈوکیٹ نتیا نند نے بتایا کہ بار بار وزیراعظم، وزیر اعلی و دیگر حکام کو اس عمارت کے تحفظ و تجدید کے لیے مکتوب روانہ کئے گئے لیکن سبھی نظر انداز کر رہے ہیں۔
مزید پڑھیے: سوامی وویکانند کی شخصیت و خدمات پر خصوصی رپورٹ
انہوں نے کہا کہ کنیا کماری میں جب سوامی ویویکانند نے ایک دن قیام کیا تھا تو اس جگہ کو سیاحتی مقام بنا دیا گیا لیکن بنارس کی اس عمارت میں سوامی ویویکانند نے ڈیڑھ ماہ قیام کیا تھا یہاں پر بیٹھ کر متعدد خطوط لکھے تھے اس کے باوجود حکومت نظر انداز کررہی ہے۔
واضح رہے کہ اس مقام پر بی جے پی کے رہنما مرلی منوہر جوشی اور سماج وادی پارٹی کے رہنما اعظم خاں سمیت متعدد رہنماؤں نے اس کا جائزہ لیا ہے۔ اس سے متصل زمین پر بی جے پی کے موجودہ کابینہ وزیر رویندر جائسوال نے پولیس اسٹیشن کی تعمیر کی تجویز پیش کی ہے۔
