ریاست اترپردیش کے وزیر اعلی یوگی آدتیہ ناتھ نے آج پریس کانفرنس کے ذریعے کورونا وائرس کے پیش نظر سبھی تعلیمی اداروں میں 22 مارچ تک احتیاطی تعطیل کا اعلان کیا ہے، لیکن جن اسکولز میں امتحانات جاری ہیں۔ وہ امتحان ختم ہونے کے بعد بند ہوجائیں گے۔
وزیراعلیٰ نے کہا کہ 'ہم نے کورونا وائرس سے بچاؤ کے لئے 4100 ڈاکٹرز کو تربیت دی ہے، جو ہر ضلع میں الگ وارڈ بنا کر اس کی نگرانی کر رہے ہیں ۔اس کے ساتھ ہی 24 میڈیکل کالجوں میں 448 بیڈ بھی محفوظ رکھے گئے ہیں۔'
وزیراعلیٰ نے کہا کہ 'یوپی میں اب تک مجموعی طور پر 11 معاملات مثبت پائے گئے ہیں۔ جن میں سے 7 آگرہ ، 2 غازی آباد اور ایک لکھنؤ ایک نوئیڈا سے ہے۔'
ان میں سے ایک مریض لکھنؤ کے کے جی ایم یو میں زیر علاج ہے، جبکہ باقی تمام مریضوں کا علاج دہلی میں جاری ہے۔
وزیر اعلی یوگی آدتیہ ناتھ نے کورونا وائرس کے انفیکشن پر قابو پانے کے لئے محکمہ صحت سمیت متعدد دیگر محکموں کا اجلاس آج بلایا تھا جس کے بعد یہ فیصلہ لیا گیا۔
