اترپردیش کے وزیراعلی یوگی آدتیہ ناتھ نے گزشتہ 24 اکتوبر کو دبئی میں پاکستان اور انڈیا کے مابین ہونے والے میچ میں پاکستان کی فتح کا اترپردیش میں جشن منانے والوں کے خلاف ملک سے غداری کے سخت قانون کے تحت کارروائی کرنے کا حکم دیا ہے۔ وزیراعلی یوگی ادیتہ ناتھ نے تمام اضلاع کے اعلی افسران کو یہ حکم جاری کردیا گیا ہے۔ اس سلسلے میں پورے اترپردیش میں ابھی تک سات افراد کے خلاف مقدمے درج کرکے کاروائی کی گئی۔
واضح رہے کہ آگرہ کے جگدیش پورہ تھانہ میں بی جے پی رہنماؤں کے ذریعے آگرہ کے آر بی ایس انجینئرنگ کالج میں تعلیم حاصل کر رہے تین کشمیری طلبا کے خلاف تحریر دی گئی، جس پر پولیس نے ایف آئی آر درج کرتے ہوئے تینوں کشمیری طالب علموں کو گرفتار کر لیا۔ تازہ اطلاعات کے مطابق ان پر ملک سے غداری کی سخت دفعات کے تحت بھی کاروائی کی جا رہی ہے۔ ان طالب علموں پر دفعہ 153 اے 505(1)بی اور آئی ٹی ایکٹ کی دفعہ 66 کے تحت مقدمہ درج کیا گیا۔ آج انہیں مجسٹریٹ کے سامنے پیش کیا گیا۔
پولیس نے بتایا ہے کہ واٹس ایپ اسٹیٹس اسکرین شاٹ اور واٹس ایپ چیٹ سمیت متعدد ڈیجیٹل ثبوت اکٹھا کیے گئے ہیں، جسے کورٹ کے سامنے پیش کیا جائے گا۔
اسی طرح اترپردیش کے بدایوں ضلع کہ فیض گنج تھانہ میں نیاز کے خلاف مقدمہ درج کیا گیا ہے۔ الزام ہے کہ نیاز نے فیس بک اکاؤنٹ پر پاکستان کے کرکٹ میچ کے جیت کی حمایت میں پوسٹ اپلوڈ کی تھی، جس کے بعد انہیں گرفتار کر لیا گیا ہے۔اسی طرح سیتاپور کے رام پور متھورا تھانے میں فیس بک پر پاکستان کی جیت پر تبصرہ کرنے والے مشرف کے خلاف بھی مقدمہ درج کر لیا گیا۔
وہیں بریلی کے عزت نگر میں ایک شخص نے واٹسپ پر پاکستان کی جیت کی حمایت میں اسٹیٹس لگایا تھا۔ عزت نگر تھانے میں ایک دوسرے شخص کے خلاف بھی کیس درج کیا گیا ہے۔ اترپردیش حکومت نے تمام اضلاع سے پاکستان کے کرکٹ میچ جیتنے کی خوشی منانے والوں کی رپورٹ طلب کی ہے۔ اس پر ڈی جی پی مکل گوئل نے تمام اضلاع کی پولیس کو سخت کارروائی کرنے کی ہدایت کی ہے۔
وزیر اعلی یوگی آدیتہ ناتھ کے دفتر سے ایک ٹویٹ شیئر کرتے ہوئے اطلاع دی گئی ہے کہ جن لوگوں نے پاکستان کی جیت کی حمایت میں جشن منایا ہے ان پر ملک سے غداری کرنے کا مقدمہ درج کیا جائے گا اور اس کے تحت کارروائی کی جائے گی۔
