بی جے پی حکومت کی جانب سے گزشتہ سرکاروں میں تعمیر کئے گئے مقامات کے ناموں کو تبدیل کرنے اور نئے نام رکھنے کا سلسلہ بدستور جاری ہے۔ اس سلسلہ کو مزید طویل کرتے ہوئے اب رامپور کی قومی شاہراہ پر واقع ایک فلائی اوور کا نام راجہ رام سنگھ سیتو رکھا گیا ہے۔ جس کا افتتاح اقلیتی امور کے مرکزی وزیر مختار عباس نقوی نے کیا۔
اس دوران انہوں نے ضلع انتظامیہ آنجنئے کمار سنگھ کی ستائش کرتے ہوئے کہا کہ یہ انہی کی ریسرچ اور کوششوں کا نتیجہ ہے کہ رامپور میں اس پل کا نام 'راجہ رام سنگھ سیتو' رکھا جا رہا ہے۔
نقوی نے کہا کہ رامپور کی سینکڑوں برس قدیم تاریخ سے پتا چلتا ہے کہ جس شخصیت کے نام پر ہمارا ضلع رامپور کا نام ہے ان کا نام راجہ رام سنگھ تھا، لیکن بدقسمتی سے ہمارے درمیان سینکڑوں برسوں تک ان کے نام کی کوئی یادگار قائم نہیں ہو سکی۔
انہوں نے کہا کہ یہاں نوابین کا دور بھی رہا اس کے بعد انگریزی سامراج بھی برسوں قائم رہا اور ملک آزاد ہونے کے بعد بھی یہ نام گمنامی میں ہی رہا۔
مرکزی وزیر نے کہا کہ اس لحاظ سے اس پل کا نام راجہ رام سنگھ سیتو رکھنا ایک بڑی کوشش ہے۔
قابل ذکر ہے کہ ناموں کی تبدیلی کا عمل سب سے زیادہ ریاست اترپردیش میں دیکھنے کو مل رہا ہے۔ جب سے یوگی آدیتیہ ناتھ نے وزیر اعلی کا چارج سنبھالا ہے تب سے لیکر اب تک اترپردیش کے کئی اضلاع کے ناموں کو بھی تبدیل کیا جا چکا ہے۔
وہیں گزشتہ دنوں یو پی کے رامپور میں سابق وزیر محمد اعظم خاں کے ذریعہ تعمیر کردہ تین گیٹوں اور ایک پارک کا نام بھی تبدیل کیا جا چکا ہے۔ ان ناموں کی تبدیلی کے افتتاح کا شرف بھی مختار عباس نقوی نے ہی حاصل کیا تھا اور آج اس پل کے نام کی تبدیلی کا افتتاح بھی نقوی کے ہی ہاتھوں ہی عمل میں آیا۔
مزید پڑھیں:
'عیسیٰ بھی کہہ رہے ہیں کہ اللہ ایک ہے'
اس دوران ضلع انتظامیہ آنجنئے کمار سنگھ نے اپنے خطاب میں کہا کہ ابھی کئی ایسے کام اور نام ہیں جو ان کے پیش نظر ہیں جلد ان کو بھی انجام دیا گا۔ اب دیکھنے والی بات یہ ہوگی کہ مزید کن کن مقامات کے نام رکھ کر یا تبدیل کرکے ترقی کے پرچم پہرائے جائیں گے۔
