اے ایم یو کا جواہر لعل نہرو میڈیکل کالج ملک کے بڑے سرکاری اسپتالوں میں شامل ہے جہاں پر ضلع علی گڑھ سمیت ریاست کے مختلف اضلاع سے بھی خاصی تعداد میں مریض علاج کے لیے آتے ہیں۔
یونیورسٹی انتظامیہ نے جواہر لعل نہرو میڈیکل کالج میں بڑھتی مریضوں کی تعداد کو مدنظر رکھتے ہوئے شعبہ میڈیسن میں دو نئی او پی ڈی سمیت دیگر جدید سہولیات کا آغاز کیا ہے جس سے اب دور دراز سے آنے والے مریضوں کو علاج میں سہولیت ہوگی.
جواہر لعل نہرو میڈیکل کالج کے میڈیسن شعبہ میں دو نئی او پی ڈی اور دیگر جدید سہولیات :
1۔ جیر یارٹک یا سینئر سٹیزن سپر اسپیشلسٹ او پی ڈی
2۔ ہیماٹولوجی سپر اسپیشلسٹ او پی ڈی
3۔ میڈیسن او پی ڈی کی عمارت میں ای سی جی خدمات
4۔ ویڈیو لیرنگو اسکوپ جسے میڈیکل آئی سی یو کے لیے ڈاکٹر ایس حیدر نے عطیہ کیا ہے
5۔ میڈیکل آئی سی یو میں تین پی ایم کیئر وینٹی لیٹر
6۔ پیشینٹ ٹرانسپورٹ ملٹی چینل مانیٹر کی سہولیات شامل ہیں
میڈیکل کالج کے پرنسپل پروفیسر شاہد علی صدیقی نے پروفیسر راکیش بھارگو (ڈین، فیکلٹی آف میڈیسن)، پروفیسر حارث خان (میڈیکل سپریٹنڈنٹ)، پروفیسر محمد آفتاب ( ایڈیشنل میڈیکل سپریٹنڈنٹ) اور مختلف سربراہان شعبہ و اساتذہ کی موجودگی میں مذکورہ سہولیات کا افتتاح کیا۔
اس موقع پر انہوں نے کہا کہ امراض کی تشخیص اور بہتر علاج میں جدید طبی سہولیات کا اہم کردار ہے۔
انہوں نے مریضوں کو جواہر لعل نہرو میڈیکل کالج کی جانب سے فراہم کی جانے والی مختلف دیگر سہولیات کا ذکر بھی کیا۔
میڈیسن شعبہ کے چیئرمین پروفیسر انجم ایم چغتائی نے کہا، 'عمر رسیدہ افراد کو امراض تنفس، مختلف قسم کے کینسر، خون کے امراض وغیرہ کا سامنا رہتا ہے، چنانچہ علیحدہ جیریاٹرک او پی ڈی اور ہیماٹولوجی سپر اسپیشلسٹ او پی ڈی بہت مفید ثابت ہوگی۔'
یہ بھی پڑھیں: علیگڑھ: چار سالہ بچے کے دل کا کامیاب آپریشن، پیس میکر نصب
انستھیسیا شعبہ کے چیئرمین پروفیسر احسان قاضی نے میڈیکل آئی سی یو میں ویڈیو لیرنگواسکوپ کے طریقہ استعمال کا مظاہرہ کیا۔
