کانگریس کی جنرل سکریٹری پریانکا گاندھی نے یوگی حکومت کو ہدف تنقید بناتے ہوئے کہا ہے کہ اترپردیش میں جرائم کا سیلاب آگیا ہے اور لا اینڈ آرڈر مکمل طور پر ختم ہوچکا ہے۔
محترمہ گاندھی نے جمعہ کے روز کہا 'اتر پردیش میں قانون و انتظام دم توڑ چکا ہے۔ اب عام لوگوں کی جانیں لی جارہی ہیں۔ کوئی بھی خود کو کہیں بھی محفوظ محسوس نہیں کرتا، خواہ وہ گھر ہو، سڑک یا دفتر ہو۔'
انہوں نے بتایا کہ صحافی وکرم جوشی کو دو روز قبل غازی آباد میں قتل کیا گیا تھا اور اب کانپور میں ایک اور ہولناک واقعہ پیش آیا ہے۔ انہوں نے کہا 'وکرم جوشی کے بعد اب اغوا شدہ سنجیت یادو کو کانپور میں قتل کردیا گیا۔ پولیس نے اغوا کاروں کو رقم بھی دلوائی اور انہیں قتل کردیا گیا۔'
