ریاست اترپردیش کے امروہہ ضلع کے کوتوالی علاقے میں گذشتہ رات کانت روڈ پر چوروں نے چھ دکانوں میں چوری کی واردات کو انجام دیا ہے۔ امروہہ ضلع میں مستقل طور پر ہو رہی چوری کی وارداتوں نے پولیس کے حفاظتی نظام پر سوال کھڑے کر دیے ہیں۔
شہر کوتوالی علاقے میں گزشتہ رات چوروں نے چھ دکانوں کے تالے توڑ ڈالے اور دکانوں میں رکھے انورٹر سمیت ضروری سامان اور نقدی پر ہاتھ صاف کر گئے۔
متاثرہ دکانداروں کا کہنا ہے کہ 'انورٹر بیٹری اور کچھ نقدی کے ساتھ ساتھ دکان میں رکھی ہوئی چیزیں بھی چوری ہوگئیں۔ چوری کا یہ سارا واقعہ ایک دکان کے باہر لگے سی سی ٹی وی میں قید ہو گیا ہے۔ جس میں دو نوجوان دکان کا تالا توڑتے ہوئے دکھائی دے رہے ہیں۔
وہیں چوری کی اطلاع ملنے پر پولیس نے دکانوں کا معائنہ کیا اور کہا کہ جلد ہی واقعے کا انکشاف کر دیا جائےگا۔
فی الحال پولیس معاملے کی تحقیقات کر رہی ہے۔
