دو ماہ سے بس ڈرائیورز کو تنخواہ نہیں ملی

ریاست اترپردیش کے ضلع بارہ بنکی میں روڈویز کی انڈرٹیکنگ بسوں کے ڈرائیورز کی تنخواہ کو معلق رکھا گیا ہے جس کے سبب وہ فاقہ کشی کا شکار ہو گئے ہیں۔

لاک ڈاؤن کے دوران مسلسل اپنی خدمات پر مامور ڈارئیورز اپنی خدمات انجام دے رہے ہیں لیکن اس کے باوجود انہیں دو ماہ کی تنخواہ نہیں ملی ہے، جس کی وجہ سے ان کی مالی حالت خستہ ہو گئی ہے۔

واضح رہے کہ بارہ بنکی ڈیپو میں ایک بھی بس روڈویز کی نہیں ہے، 140 انڈرٹیکنگ بسوں کے ذریعہ ضلع کی عوام سفر کرتی ہے اور ان بسوں کو ڈرائیورز، بس مالکان مہیا کراتے ہیں اور ان کی تنخواہ بھی بس مالکان ہی دیتے ہیں۔

لاک ڈاؤن میں ضروری کاموں اور مہاجر مزدوروں کو ان کے گھر پہنچانے کے لئے مسلسل دو ماہ ان سے کام لیا گیا ہے لیکن تنخواہ کے لئے بس مالکان نے اپنے ہاتھ کھڑے کر دئے۔

بس مالکان کا کہنا ہے کہ اگر محکمہ انہیں پیسے دیتا ہے، تو وہ ڈرائیورز کی تنخواہ ادا کریں گے ورنہ نہیں۔