ریاست اترپردیس کے بریلی میں مریدین کے روحانی علاج کے لیے مشہور درگاہ شاہ دانہ ولی سرکار کے عرس کا آغاز آج پرچم کشائی کی رسم کے ساتھ کیا گیا۔
اس دوران نماز مغرب کے بعد درگاہ اعلیٰ حضرت سے پرچم کشائی کا جلوس نکالا گیا، جو شہر کے مختلف سڑکوں سے ہوتا ہوا درگاہ شاہ دانہ کے آستانہ پہنچا۔ پرچم کو شاہ دانہ ولی سرکار کے مزار پر پیش کیا گیا اور عرس کا آغاز ہو گیا۔
غورطلب ہے کہ اس برس شاہ دانہ ولی سرکار کا یہ 439 واں عرس ہے لیکن 14 برس قبل سے ہی پرچم کی رسم ادا کی جاتی ہے۔ دراصل مریدین کا یقین ہے کہ ذہنی طور پر بیمار، آسیب، بھوت پریت، جنّ اور دیگر غیر انسانی حرکات کرنے والے بیمار لوگوں کا آستانہ پر علاج کیا جاتا ہے۔
اس درگاہ پر آنے والے زائرین میں غیر مسلم مریدین کی تعداد مسلمانوں سے کسی صورت میں کم نہیں ہوتی ہے۔ قومی سطح پر بریلی ضلع کے علاوہ تمام اضلاع سے کثیر تعداد میں مریدین، زائرین اور عقیدت مند حاضری دیتے ہیں۔
