وزیر اعظم دفتر کی ہدایت پر ڈی آر ڈی او نے بی ایچ یو اسپورٹس اسٹیڈیم میں ہسپتال بنانے کے لیے سروس شروع کر دی ہے اور تقریباً 15 دنوں میں جدید طبی سہولیات سے آراستہ ہسپتال تیار کر لیا جائے گا۔
گذشتہ پیر کو رکن اسمبلی اے کے شرمانے کی قیادت میں ضلع انتظامیہ کے اعلیٰ افسران کی میٹنگ ہوئی تھی جس میں عارضی اسپتال بنانے پر تبادلہ خیال کیا گیا تھا۔ اے کے شرمانے کے مطابق یہ ہسپتال جرمن ہینگر سے تعمیر کیا جائے گا جو آئندہ 15 دنوں میں تیار ہوجائے گا۔
ڈی آر ڈی او کی ٹیم مسلسل 24 گھنٹہ کام کر کے اس ہسپتال کو تیار کرے گی۔ ہسپتال میں بجلی، پانی سیور کنکشن کے لیے افسران نے جائزہ لے لیا ہے جبکہ یہاں فارمیسی آکسیجن سپلائی وینٹیلیٹر کی سہولتیں بھی دی جائیں گی۔
واضح رہے کہ بنارس وزیراعظم نریندر مودی کا پارلیمانی حلقہ ہے اور گزشتہ اتوار کو وزیر اعظم نے جائزہ میٹنگ طلب کی تھی جس میں بنارس کے اعلی افسران سیاسی رہنما اور ڈاکٹرز شامل تھے۔
مانا جا رہا ہے کہ وزیر اعظم نریندر مودی کی ہدایت پر اب طبی سہولیات میں کچھ بہتری آئے گی۔
موجودہ وقت میں بنارس کی عوام طبی سہولیات کے فقدان کے باعث در در بھٹکنے پر مجبور ہیں۔ آکسیجن اور ریمڈیسیور انجیکشن کی قلت عوام سخت پریشان ہے۔
اس ہسپتال میں ڈاکٹرز، میڈیکل اسٹاف اور ٹیکنیشین کی تعیناتی پر ابھی سے انتظامیہ جنگی پیمانے پر کام کررہی ہے۔ بنارس ہندو یونیورسٹی کے ڈاکٹرز میڈیکل اسٹاف کے اعداد و شمار طلب کئے گئے ہیں۔ ساتھ ہی اطراف کے اضلاع سے بھی ڈاکٹر کی تعداد پر نظر ہے۔
بنارس زون کے کمشنر دیپک اگروال کے مطابق ریلوے اور ہومی بھابھا کینسر اسپتال کے ایک حصے کو کورونا ہسپتال میں تبدیل کرنے کی تیاریاں چل رہی ہے۔
