ریاست اترپردیش کے ضلع بریلی میں آزاد سماج پارٹی کی جانب سے منعقدہ پریس کانفرنس میں سنی علماء کونسل کے قومی صدر اور آزاد سماج پارٹی کے ڈویژنل انچارج مولانا انتظار قادری نے کہا کہ اس وقت نام نہاد سیکولر سیاسی جماعتیں ملک میں غریبوں، مزدوروں اور مسلمانوں کی آواز میں آواز ملانے سے گریز کر رہی ہیں اور مسلمانوں سے ایک پوشیدہ فاصلہ رکھنا چاہتی ہیں، ایسے حالات میں آزاد سماج پارٹی کے بانی چندر شیکھر آزاد نے مسلمانوں کے لیے آواز بلند کرنے کا حوصلہ دکھایا ہے جو واقعی قابلِ تعریف بات ہے۔
مولانا انتظار قادری نے کہا کہ اس وقت ملک میں تمام کمزور اور مجبور طبقہ کے لیے آواز بلند کرنے والا کوئی نہیں ہے لیکن چندر شیکھر آزاد نے نہ صرف مسلمانوں بلکہ ملک میں تمام طبقوں کے لیے اپنی آواز بلند کی ہے۔ سی اے اے اور این آر سی کے معاملہ میں بھی جب مسلمانوں کو پریشان کرنے اور ہراساں کرنے کی کوشش کی جا رہی تھی، اُس وقت مسلمانوں کے ووٹوں پر سیاست کرنے والی نام نہاد سیاسی جماعتیں اور اُن سیاسی جماعتوں کے رہنما خاموش تھے جس سے مسلمان مایوس تھے لیکن ایسے پر آشوب ماحول میں اپنی خاموشی کو توڑتے ہوئے چندر شیکھر آزاد نے دہلی کی جامع مسجد جا کر این آر سی اور سی اے اے کے خلاف نعرہ لگائے اور ہمارے حقوق کے لیے اپنی آواز بلند کی۔ انہوں نے مسلمانوں کی مایوسی کو توڑنے کا کام کیا ہے۔
مولانا انتظار قادری نے مزید کہا کہ ہم اُس حوصلہ مند نوجوان رہنما کو دل سے سلام کرتے ہیں۔ وہ جیل سے رہا ہونے کے بعد عدالت عظمیٰ کی ہدایات کی پرواہ کئے بغیر گھر میں نہیں سوئے، بلکہ جیل سے سیدھے نکل کر مسلمانوں کے لیے جامع مسجد، جامعہ اور شاہین باغ جا کر پولیس کے سامنے ایک طاقت بن کر کھڑے رہے لہذا اب ضرورت ہے ایسے رہمنا کے ہاتھوں کو مضبوط بنایا جائے۔
انہوں نے تمام طبقات سے آزاد سماج پارٹی سے وابستگی بنانے کی اپیل کی۔ اس دوران اُنہوں نے آئندہ 25 اپریل کو بریلی میں چندر شیکھر کے دورے میں شرکت کرنے کی بھی اپیل کی۔
