لکھنؤ: مرکز علم نجف سے تشریف لائے مولانا سید حسن اکبر نے حوزہ علمیہ ابوطالب ؑ لکھنؤ کے طلبہ اساتذہ سے ملاقات کی۔انہوں نے طلبہ سے خطاب کرتے ہوئے کہاکہ ہمیں عربی پر کام کرکے زیادہ سے زیادہ بہتر بنانا ہے، تاکہ طلبہ کی عربی فہمی اور عربی تکلم کو مضبوط بنایا جائے۔طلبہ ہمیشہ تعلیمی سر گرمیوں میں عربی کو اپنی ترجیحات میں شامل کریں۔ علم ہی وہ نور ہے جس کو حاصل کر کے انسان دینی و دنیا وی مقاصد کو حاصل کرسکتا ہے۔
مولانا سید حسن اکبر نےکہاکہ ہمیشہ علم کے تئیں حساس رہیں۔ علم وہ نو رانی و روحانی سرمایہ ہے،جس کے ذریعہ سماجی برائیوں کو ختم کیا جا سکتا ہے۔ علم کے ساتھ عمل بھی ضروری ہے۔ اگر علم کے ساتھ عمل نہیں ہے تو علم کسی کام کا نہیں ہے۔انہوں نے طلبہ کو نصیحت کرتے ہوئے کہاکہ ہمیشہ کلاس اسباق پر مکمل عبور حاصل کریں،طلبہ کے لیے ضروری ہے کہ کلاس میں نوٹ بک لیکر جائیں تاکہ استاد کی نصیحتوں اور ان کی قیمتی باتوں نوٹ کرلیں جو آگے چل کر آپ کے لیے مشعل راہ ہوگی۔
اپنے استاد کی عزت کریں اور ان کی ہدایتوں پر عمل کریں، کوئی بھی طلبہ استاد کی نصیحتوں کو بھلا کر اپنی منزل مقصود نہیں پہنچ سکتا ہے۔
