ریاست اترپردیش کے دارالحکومت لکھنؤ میں 'آل انڈیا محمدی مشن' کے قومی صدر سید ایوب اشرف نے ای ٹی وی بھارت سے بات چیت کے دوران کہا کہ کورونا وائرس کو ختم کرنے کی ذمہ داری صرف ہماری نہیں ہے، ہم سے کہیں زیادہ ذمہ داری سرکار کی ہے۔
انہوں نے کہا کہ سرکار نے پہلے ہی دکان، بازار، سنیما گھروں کو کھولنے کی اجازت دے دی ہے ایسے میں ہمیں امید ہے کہ جلوس محمدی صلی اللہ علیہ وسلم کو بھی نکالنے کی اجازت دی جائے گی۔
سید ایوب اشرف نے کہا کہ 'ایک طرف ہم شریعت کے پابند ہیں، تو وہیں دوسری جانب آئین کے مطابق ہمیں چلنا ہے اور حکومت کے جو بھی احکامات ہیں ہم اس کے پابند رہیں گے، کیوں کہ ہم سرکار سے بغاوت کرکے کسی طرح کا جلوس نہیں نکالنا چاہتے'۔
انہوں نے سرکار کو خط لکھ کر مطالبہ کیا ہے کہ عید میلاد النبی میں جلوس نکالنے کی اجازت دی جائے۔
انہوں نے کہا کہ ہم کووڈ-19 گائیڈ لائن کے مطابق جلوس نکالیں گے۔
سید اشرف نے کہا کہ اگر سرکار جلوس نکالنے کی اجازت نہیں دیتی تو ہم تمام عاشقان رسول صلی اللہ علیہ وسلم سے اپیل کرتے ہیں، وہ اپنے گھروں میں پرچم کشائی اور عید میلاد النبی صلی اللہ علیہ وسلم کا اہتمام کریں۔
خیال رہے کہ لکھنؤ سے نکلنے والا 'مدح صحابہ' جلوس کے ذمہ داران نے کورونا وبا کے پیش نظر جلوس نہ نکالنے کا فیصلہ کیا ہے۔
ان کے اس فیصلے کا دوسرے جلوسوں پر بھی اثر پڑسکتا ہے تاہم اب دیکھنا ہوگا کہ اترپردیش حکومت جلوس نکالنے کے لیے کوئی گائیڈ لائن جاری کرتی ہے یا کورونا وائرس کے سبب جلوس نکالنے کی اجازت نہیں دیتی۔
