ریاست اترپردیش کے ضلع بارہ بنکی میں سماجوادی کے پارٹی دفتر سے نکل کر ایس پی کارکنان نے چھایا چوراہے پر شی جنپنگ کا پتلا جلایا۔
اس دوران انہوں نے چین کے خلاف نعرے بازی بھی کی۔ پارٹی کے ضلع صدر حافظ ایاز نے ای ٹی وی بھارت سے بات کرتے ہوئے کہا 'جس وقت ملائم سنگھ یادو وزیر دفاع تھے تو انہوں نے چین کو اس کی حد کے اندر چار کلومیٹر تک کھدیڑ دیا تھا۔ لیکن موجودہ حکومت کے دور اقتدار میں ملک کی سرحدیں محفوظ نہیں رہیں'۔
انہوں نے کہا 'نیپال جیسا ملک جسے بھارت نے سہارا دیا ہے وہ بھی آج ملک کو آنکھ دکھانے کی کوشش کر رہا ہے'۔
انہوں نے مزید کہا 'ان تمام مسائل کو لیکر ایس پی کارکنان نے شی جن پنگ کا پتلا نذر آتش کیا ہے اور آج سے عہد کیا ہے کہ وہ آئندہ چینی ساز و سامان کا استعمال نہیں کریں گے'۔
حال ہی میں لداخ کی وادی گلوان میں سرحد کے قریب بھارت اور چین کے درمیان جھڑپ ہوئی تھی، جس میں 20 بھارتی فوجی جوان ہلاک ہو گئے تھے، اور اس کے بعد سے ہی ملک بھر میں چین کے خلاف مظاہرے کیے جارہے ہیں۔
مختلف سیاسی پارٹیوں کی جانب سے چین کے پروڈیکٹس کا بائکاٹ کرنے کی گذارش کی جارہی ہے اور لوگ چینی صدر کا پتلا جلا رہے ہیں اور چینی سامان کو توڑ کر پھینک رہے ہیں۔
