کورونا وائرس کے انفکشن کو کنٹرول میں ہوتا دیکھ اترپردیش کے وزیر اعلی یوگی آدتیہ ناتھ نے سیکنڈری ایجوکیشن اسکولوں کو 15 اگست سے دوبارہ کھولنے کا فیصلہ کیا ہے جبکہ ہائی ایجوکیشن میں ریگولر تعلیم یکم ستمبر سے شروع ہوگی۔
پیر کو ٹیم۔9 کے ساتھ ریگولر میٹنگ میں وزیر اعلی نے افسران کو نئے تعلیمی سیشن کے آغاز کی تیاری کا حکم دیا۔ تمام بورڈوں کے ہائی اسکول و انٹرمیڈیٹ کے نتائج کا اعلان کردیا گیا ہے۔ ایسی حالت میں گریجویشن سطح پر داخلوں کا آغاز 5 اگست سے ہوجانا چاہئے۔
ساتھ ہی سیکنڈری ایجوکیشن کے اداروں میں بھی داخلوں کی کاروائی شروع کی جانی چاہئے۔ طلبہ کے کلاسز کا آغاز 15 اگست کو آزادی کا امرت مہوتسو کی تقریب کے انعقاد سے ہوگا۔ 16اگست سے50 فیصدی طلبہ ریگولر کلاسز کا آغاز ہوگا۔
یہ بھی پڑھیں: UP Board Result 2021: یوپی بورڈ کے نتائج کا اعلان، لڑکیوں نے بازی ماری
انہوں نے مزید کہا کہ 'ہر حال میں اعلی ایجوکیشن میں ریگولر کلاسز کا یکم ستمبر سے آغاز کے لئے تیاریاں شروع کر دینی چاہئے۔ وزیر اعلی نے کہا کہ 'تعلیمی اداروں میں درس وتدریس کے آغاز کے لئے سینیٹائزر، تھرمامیٹر، ماسک وغیرہ کی مکمل دستیابی کو یقینی بنائیں۔ ساتھ ہی سیٹیوں کی ترتیب میں دو گز کے فاصلے کے ساتھ ہر ادارے میں کووڈ پروٹوکول پر پوری سختی سے عمل درآمد کو یقینی بنائیں۔'
انہوں نے مزید کہا کہ 'تعلیمی اداروں کے کھلنے کے ساتھ یہ بھی انتہائی مناسب موقع ہوگا کہ ہم 18سال سے اوپر کی عمر والے طلبہ کی ٹیکہ کاری کے لئے کیمپس میں اسپیشل ٹیکہ کاری مہم کا آغاز کریں۔ اس ضمن میں محکمہ صحت کی جانب سے پہلے ہی تمام ضروری اقدامات کئے جانے چاہیں۔'
(یو این آئی)
