آج طویل عرصے کے بعد نوئیڈا گوتم بدھ نگر میں اسکول و کالج کھل گئے ہیں۔ خواتین پولیس افسران اور عملہ کے ذریعہ لڑکیوں کے بڑے اسکولوں اور کالجوں کے اطراف میں پولیس کا سخت گشت جاری رہا۔
ڈی سی پی ویمن سیفٹی ورندا شکلا کی سربراہی میں خواتین پولیس ٹیم نے گشت کے دوران اسکولوں اور کالجوں کی لڑکیوں کو کورونا سے بچاو کے سلسلے میں معاشرتی دوری، ماسک کے استعمال اور دیگر اقدامات کے بارے میں تفصیلی معلومات دی۔
ساتھ ساتھ پولیس عملہ نے لڑکیوں کی حفاظت سے متعلق مختلف پہلوؤں پر تبادلہ خیال کیا اور کہا کہ کوئی خطرہ محسوس ہونے پر فوری طور پر خواتین پولیس سے رابطہ کریں تاکہ ان کی حفاظت سے متعلق خواتین پولیس کے ذریعہ خصوصی کارروائی کی جاسکے۔
واضح رہے کہ اس وقت اتر پردیش حکومت مشن شکتی مہم چلا رہی ہے۔ حکومت کے اس اہم پروگرام کے تحت مختلف سطح پر خواتین کے تحفظ سے متعلق مختلف کارروائیوں کو یقینی بنایا جارہا ہے۔ آج سے اسکول و کالج کھلنے کے بعد ویمن پولیس کی بڑی تعداد اسکول کے اطراف میں موجود نظر آئی۔
پولیس کمشنر الوک سنگھ کے مطابق خواتین کی حفاظت کے سلسلے میں اس طرح کے مزید اقدامات کو مستقل طور پر یقینی بنایا جائے گا۔
