سہارنپور: نماز جمعہ اورعید کی نماز گھر پر ہی ادا کرنے کی اپیل

مہلک وبا کورونا کے قہر سے نسل انسانیت کراہ رہی ہے۔ دنیا کی تمام ترسرگرمیاں تقریبا بند ہو چکی ہیں۔ ایک ایسے وقت میں کہ جب نسل انسانیت کو اس عالمی وبا سے نجات دلانے کی طلب میں طبی عملہ شب وروزجدوجہد کر رہا ہے۔ اسی درمیان عالم اسلام پر ماہ مقدس سایہ فگن ہوا۔

کورونا کے قہر نے مذہبی رسومات اور عبادات کی ادائیگی پر بھی اثر ڈالا ہے اور اسی کے سبب عالمی طور پر مسلمان اس ماہ مبارک میں اپنے ہی گھروں میں محصور ہو کر عبادات و ریاضت کی ادائیگی پر مجبور ہیں۔

اب جب کہ ماہ مقدس کا دوعشرہ پایہ تکمیل کو پہنچ چکا ہے۔ شب قدر اور عید کی آمد آمد ہے۔ ایسے وقت میں مذہبی شخصیات کے علاوہ انتظامیہ کی جانب سے بھی مسلمانوں سے اپیل کی جا رہی ہے کہ وہ نماز جمعہ اور عید کی نماز بھی اپنے گھروں میں ہی ادا کریں۔

ادھر اترپردیش کے ضلع سہارنپور کے ایس ایس پی دنیش کمار پی نے عوام سے اپیل کی ہے کہ جمعہ اور عید کی نماز کو لے کر افواہوں پر توجہ نہ دیں اور تمام افراد اپنے اپنے گھر پر رہ کر ہی عید کی اور جمعہ کی نماز ادا کریں۔ تمام افرد کے دروازے تک کھانے پینےکی تمام اشیا مہیا کرائی جائیں گی۔ایس ایس پی دنیش کمار پی نے لوگوں سے اپیل کرتے ہوے کہا کہ ایسی کسی افواہ پر دھیان نہ دیں جس میں یہ کہا جا رہا ہے کہ جمعہ کی نماز اور عید کی نماز مسجد میں ادا کی جائے گی ۔ انہوں نے کہا کہ جمعہ اور عید کی نماز کو مسجدوں میں اور سڑکوں پر ادا کرنے کی اجازت نہیں ہے۔اسی لئے تمام لوگوں سے اپیل کی جا رہی ہے کہ عید کی نماز اپنے اپنے گھروں میں رہ کر ہی ادا کریں اور لاک ڈاؤن پر پوری طرح سے عمل کریں۔ انہوں نے مزید کہا کہ ہاٹ اسپوٹ علاقے کے علاوہ دیگر علاقوں میں بھی کھانے پینے کی تمام ضروری چیزیں مہیا کرائی جارہی ہیں تا کہ کسی کو بھی کسی طرح کی کوئی بھی پریشانی نہ ہو۔