اندریش کمار آر ایس ایس کی مسلم ونگ' راشٹریہ مسلم منچ' کےسربراہ ہیں۔
انہوں نے دارالعلوم دیوبند کے مہتمم ابوالقاسم نعمانی سےخیرسگالی ملاقات کے دوران کہا کہ وہ یہاں بھائی چارے کی غرض سے آیا ہوں۔
مولانا ابوالقاسم نعمانی نے اندریش کما ر کو دارالعلوم دیوبند سے متعلق تفصیلی معلومات دی اور انہیں بتایا کہ یہاں کے اکابرین نے ملک کی آزادی کے لیے بے پناہ قربانیاں دی ہیں۔
اندریش کمار نے مفتی نعمانی سے کہا کہ دارالعلوم دیوبند سے ایساپیغام جاری کیا جائے جس سے پوری دنیا میں امن و سلامتی اور بھائی چارے کی روشنی پہنچےاور اس سے پورا ملک تعلیم و ترقی کے راستے پر گامزن ہو۔
اس پر مہتمم نے کہاکہ دارالعلوم دیوبند روز اوّل سے تعلیم و تربیت اور امن وشانتی کا پیغام پوری دنیا میں پہنچایا رہاہے۔
انہوں نے کہا کہ جنگ آزادی کے لئے یہاں کے علماءنے بنیادی کردار ادا کیا ہے اور روز اوّل سے یہاں کے فضلاءملک کی تعمیر و ترقی میں مصروف ہیں۔
آخر میں اندریش کمار نے بتایا کہ ان کے یہاں آنے کا مقصد آپسی بھائی چارے کو فروغ دینا ہے، اور امن سلامتی و محبت کی فضاء کو ہموار کرنا ہے۔
اس سے تقریباً 16 برس قبل سنہ 2004 میں بھی اندریش کمار دارالعلوم دیوبند آکر اس وقت کے مہتمم سے ملاقات کر چکے ہیں۔
انہوں نے قرآن کے حوالہ سے کہا کہ ہمیں اپنے اپنے مذہب پر قائم رہتے ہوئے ایک دوسرے کااحترام کرنا چاہئے۔
اندریش کمار نے کہا کہ ہماری پہچان مذہب کے طورپر نہیں بلکہ ایک بھارتی کے طورپر ہے، ہم سب کاوطن بھارت ہے لیکن 1947ءمیں انگریز کی سازش سے یہ ملک کی تقسیم ہوا، جس سے کروڑوں لوگ متاثر ہوئے اور وہیں سے یہ نفرتوں کا سلسلہ چل رہا ہے جس کو ختم کرکے آپس میں پیار و محبت کی فضاءپیدا کرنی چاہئے۔
