ریاست اترپردیش کے ضلع سہارنپور روڈ ویز کارپوریشن کی جانب سے اطلاع دینے کے باوجود بھی حاضری درج نہ کرانے کی وجہ سے سات ڈرائیورز اور کنڈکٹرز کو معطل کردیا گیا ہے۔
دراصل یہ پورا معاملہ سہارنپور میں اترپردیش روڈ ویز کارپوریشن کا ہے، جہاں لاک ڈاؤن سے قبل ہی سات ڈرائیورز اور کنڈکٹر غیرحاضر چل رہے تھے، جس کی وجہ سے کارپوریشن کی جانب سے ان کو کئی مرتبہ نوٹس، واٹس اپ گروپ اور فون کے ذریعہ سے اطلاع بھی دی گئی، لیکن اس کے باوجود بھی ان لوگوں نے اپنی حاضری درج کرانا تو دور نوٹس کا جواب تک دینا ضروری نہیں سمجھا جس کے سبب کارپوریشن کے ذریعہ ان لوگوں کو برخاست کردیا گیا۔
اس سلسلے میں سہارنپور اترپردیش روڈویز کارپوریشن کے اسسٹنٹ علاقائی منیجر جگدیش سنگھ نے بتایا کہ یہ لوگ لاک ڈاؤن سے قبل ہی بغیر کوئی اطلاع دیے غیرحاضر چل رہے تھے، ہمارے ذریعے ان سبھی افراد کو فون اور واٹس اپ گروپ کے علاوہ گھر پر نوٹس بھی بھیجے گئے، لیکن ان لوگوں نے کوئی تعاون نہیں کیا اور اپنی حاضری درج نہیں کرائی، جس کے سبب ان ڈرائیورز اور کنڈکٹرز پر کارروائی کی گئی ہے۔
