روڈ سیفٹی ہفتہ کے تحت انعامات تقسیم

ریاست اترپردیش کے شہر رامپور میں روڈ سیفٹی ہفتہ کے تحت مختلف مقابلوں میں کامیاب ہونے والے طلبا و طالبات کو انعامات سے نوازا گیا۔ اس موقع پر ایس پی رامپور نے حاضرین سے اپنے خطاب میں ٹریفک اصولوں کو قائم رکھنے پر زور دیا۔

روڈ سیفٹی ہفتہ کے تحت مختلف مقابلوں اور پروگراموں میں حصہ لینے والے طلبا و طالبات کو ان کی بہترین کارکردگی کے لیے اعزازات سے سرفراز کیا گیا۔ روڈ سیفٹی ہفتہ کے تحت رامپور ضلع کے مختلف مقامات پر تقریبات کا اہتمام کیا گیا تھا۔ اسکولوں میں طلبا نے پینٹنگز اور مضامین لکھ کر اپنی صلاحیتوں کا مظاہرہ کیا۔ وہیں اپنے اپنے میدان کے دیگر ماہرین کو روڈ سیفٹی ہفتہ میں تعاون کے لیے انعامات دے کر ان کی حوصلہ افزائی کی گئی۔ آج اس مہم کے آخری دن بہترین کارکردگی پیش کرنے والے لوگوں کو ہیلمیٹ اور رقومات کے چیک ادا کیے گئے۔

اس موقع پر پولیس کپتان ڈاکٹر اجے پال شرما نے ٹریفک نظام کے اصولوں کو بہتر بنانے میں تعاون کی اپیل کی۔ انہوں نے کہا کہ زندگی بہت انمول ہے۔ ہم اپنی بھی حفاظت کریں اور دوسروں کی زندگی کا بھی خیال رکھیں۔ ہماری چھوٹی سی چوک سے کسی کی زندگی جا بھی سکتی ہے اور اگر ہم نے ٹریفک اصولوں کو اختیار کیا تو ہم دوسروں کی زندگی کی سلامتی کے ضامن بھی بن سکتے ہیں۔انہوں نے اس ہفتہ کے دوران بہتر کارکردگی پیش کرنے والے لوگوں کو مبارکباد بھی دی۔اس موقع پر روڈ سیفٹی سے متعلق گائڈ لائنس کا ایک بک لیٹ کا بھی اجراء عمل میں آیا۔