جنتا کرفیو کے بعد ریاستی حکومت نے اترپردیش کے 15 اضلاع میں لاک ڈاؤن کا اعلان کیا ہے جس کے بعد اب عوامی گزرگاہیں خالی نظر آرہی ہیں۔ وہیں مذہبی رہنماؤں نے بھی عوام سے حکومت کے ذریعے جاری کردہ ہدایات پر عمل کرنے کی اپیل کی ہے اور نماز، روزہ اور عبادات پر زور دینے کو بھی کہا ہے۔
قاضی شہر بنارس مولانا یاسین احمد نے ای ٹی وی بھارت سے خاص بات چیت کرتے ہوئے کہا کہ کورونا وائرس عالمی وباء بن کر پوری دنیا کے سامنے ایک چیلنج ہے۔ بنارس کی عوام عبادت و ریاضت کریں۔ لوگوں سے دوریاں بنا کے رکھیں اور احتیاطی تدابیر پر خاص توجہ دیں۔
انہوں نے مزید کہا کہ مسجدوں میں وباء کے خاتمے کے لیے خصوصی دعاء کا اہتمام کریں۔ انہوں نے کہا کہ نماز باجماعت ادا کریں، وضو گھر سے کرکے مسجد جائیں۔
مولانا جمیل نے ای ٹی وی بھارت سے بات کرتے ہوئے کہا کہ عوام کو چاہیے کہ حکومت کے ذریعہ جاری کردہ احکامات پر عمل کریں اور عوام سے دوریاں بنا کے رکھیں۔ سینیٹائز کا استعمال کریں اور گھروں میں رہیں تاکہ کورونا وائرس جیسے خطرناک و مہلک بیماری سے لڑا جا سکے۔
مولانا فرید احمد انصاری نے ای ٹی وی بھارت کو بتایا کہ بنارس کی عوام خاص طور پر مسلم سماج سے ہم اپیل کر رہے ہیں کہ وہ گھروں میں رہیں، اللہ کی عبادت کریں اور عوامی دوریاں بنائے رکھیں۔
