لاک ڈاؤن میں بھی نہیں مل رہا ہے مستحق افراد کو راشن

اترپردیش کے رامپور میں لاک ڈاون کے دوران بھی غریب و مستحق افراد کو راشن نہیں مل پارہا ہے۔ حالانکہ ضلع مجسٹریٹ کی سخت ہدایات کے باوجود بھی راشن ڈیلر خط افلاس سے نیچے زندگی گزارنے والوں کو راشن نہیں دے رہے ہیں۔

کورونا وائرس کے خطرے سے بچنے کی تدبیر کے طور پر جاری ملک گیر لاک ڈاؤن میں سب سے زیادہ پیشانی کا سامنا خط افلاس سے نیچے زندگی گزارنے والوں کو کرنا پڑرہا ہے۔

دراصل لاک ڈاؤن کی وجہ سے تمام کام بند ہو جانے سے خط افلاس سے نیچے کی زندگی گزار رہے کنبوں کے لیے یہ وقت مزید تکلیف کا باعث بن گیا ہے۔

ایک طرف جہاں کام بند ہوجانے سے ان کے پاس اپنے کنبہ کے لیے راشن جمع کرنے تک کا پیسہ نہیں ہے تو وہیں رامپور میں غریب کنبوں کے لیے سرکاری اسکیموں کے تحت کنٹرول ریٹ پر ملنے والا راشن بھی بہت کم ہی افراد کو دستیاب ہو رہا ہے۔

یہ غریب افراد مسلسل سرکاری دفاتر کے چکر بھی کاٹ رہے ہیں لیکن کہیں سے انھیں کوئی راحت حاصل نہیں ہو رہی ہے جبکہ ضلع انتظامیہ رامپور نے خصوصی طور پر غریب اور بے سہارا افراد کے لیے محکمہ غذائی اجناس کو ہدایات جاری کرتے ہوئے کہا تھا کہ جن ضرورت مندوں کے راشن کارڈ اب تک نہیں بنے ہیں لاک ڈاؤن کے دوران انھیں راشن دینے میں کوئی رکاوٹ نہیں ہونی چاہیے۔

انتظامیہ نے اپنی ہدایات میں یہ بھی کہا تھا کہ غذائی اجناس سے متعلق افسران 36 گھنٹوں میں ان لوگوں کو راشن کارڈ مہیا کرائیں لیکن اگر ان ضرورت مندوں کی مانیں تو محکمہ غذائی اجناس کے ملازمین ضلع انتظامیہ کی ہدایات کو بھی نظر انداز کر رہے ہیں کیونکہ وہ مستحق افراد کے راشن کارڈ نہیں بنا رہے ہیں جس کی وجہ سے انھیں کو راشن نہیں مل رہا ہے۔