رامپور میں واقع مدرسہ فیض العلوم میں ہر برس کی طرح امسال بھی یوم جمہوریہ کا اہتمام پورے جوش و خروش کے ساتھ کیا گیا۔
اس موقع پر علماء کرام اور دانشواران قوم و ملت نے طلبہ کے سامنے یوم جمہوریہ کی تاریخی حیثیت بیان کرتے ہوئے ملک کے آئین کی اہمیت کو اجاگر کیا۔
اس موقع پر طلبہ سے خطاب کرتے ہوئے مدرسہ کے مہتمم مولانا اسلم جاوید قاسمی نے آئین کی پاسداری اور ملک کی جمہوریت کو بچانے اور اس کو مضبوط کرنے کے لیے اپنے جزبہ کو بیدار کرنے پر زور دیا۔
وہیں حامد انٹر کالج کے سابق پرنسپل ماسٹر اسرار احمد نے ملک کو جمہوری ملک بنانے میں علماء کرام کے کردار کی ستائش کرتے ہوئے کہا کہ ہزاروں علماء نے اپنی جانوں کی قربانی دے کر اس ملک کو صحیح معنی میں ایک جمہوری ملک بنایا۔
معروف عالم دین مولانا محمد زماں باقری نے یوم جمہوریہ کے موقع پر ملک کے لوگوں کو حب الوطنی کا پیغام دیا۔اس موقع پر طلبہ نے ملک کی جمہوریت کو مضبوط کرنے کے اپنے عزائم کا بھی اظہار کیا۔
واضح ہو کہ 26 جنوری سنہ 1950 کو ملک کا آئین نافذ ہوا تھا، آئین ساز ڈاکٹر بی آر امبیڈکر کی صدارت میں تیار کردہ یہ دستور جب ملک میں نافذ ہوا تو پورے ملک میں خوشی کی لہر دوڑ گئی۔
اسی خوشی کو ظاہر کرنے کے لیے اور نئی نسلوں تک اس کے پیغام کو پہنچانے کے مقصد سے پورے ملک میں اس تاریخ کو یادگار بنانے کے لیے یوم جمہوریہ کے طور پر اس کا اہتمام کیا جاتا ہے۔
