رامپور: متعدد معاملوں میں نامزد ملزم نبو عرف نایاب کی جائیداد ضبط

آج رامپور پولیس نے آج گینگسٹر ایکٹ کے تحت نبو عرف نایاب نامی ایک ہسٹری شیٹر کے جائیداد کو ضبط کرنے کی کارروائی کی۔وہیں ملزم کے اہل خانہ کا پولیس پر الزام ہے کہ پولیس نے بغیر نوٹس کے اس کارروائی کو انجام دیا ہے اور وہ انصاف کے لیے عدالت کا دروازہ کھٹکھٹائیں گے۔

ریاست اترپردیش کے ضلع رامپور میں پولیس نے مجرمانہ سرگرمیوں میں ملوث نبو عرف نایاب کی جائیداد کو گینگسٹر ایکٹ کے تحت ضبط کر لیا ہے۔ اس معاملے میں جہاں پولیس کا دعویٰ ہے کہ غیر قانونی طور پر جمع کی گئی جائداد کو ضبط کیا گیا ہے وہیں ملزم کی اہلیہ اور اس کے بھائی کا کہنا ہے کہ پولیس نے بغیر کسی نوٹس اور اطلاع کے اس کارروائی کو انجام دیا ہے، ان کا کہنا ہے کہ وہ پولیس کی اس کارروائی کے خلاف انصاف کے لئے عدالت جائیں گے۔

رامپور کے گاؤں سیجنی نانکار کا رہائشی نایاب کی رہائش گاہ پر آج بڑی تعداد میں پولیس فورس پہنچی۔ جہاں پولیس نے نبو کے خلاف گینگسٹر ایکٹ کے تحت کارروائی کرتے ہوئے اس کی دو منزلہ عمارت پر مشتمل جائیداد کو ضبط کرنے کی کارروائی کو انجام دیا۔ اس دوران اس کے مکان کا پورا سامان مکان سے باہر نکال کر سڑک پر رکھ دیا گیا۔

اس معاملے میں سی او دھرم سنگھ مارشل نے بتایا کہ نبو عرف نایاب کئی غیر قانونی سرگرمیوں میں ملوث تھا، اس لئے گینگسٹر ایکٹ کے تحت آج اس کی جائیداد کو ضبط کرنے کی کارروائی کی گئی۔

انہوں نے کہا کہ اس کے گھر کے علاوہ ایک پلاٹ کو بھی ضبط کیا گیا ہے، جس کی قیمت تقریبا 42 لاکھ بتائی جارہی ہے۔

وہیں اپنا گھر اجڑتا دیکھ کر ملزم نبو کی اہلیہ نے کہا کہ یہ گھر تو میرے نام ہے۔ اس کا ملزم سے کوئی لینا دینا نہیں ہے۔ پولیس ہمارے ساتھ بہت زیادتی کر رہی ہے۔
ساتھ ہی ملزم کے بھائی ناصر نے پولیس کی اس کارروائی کو غیر آئینی بتاتے ہوئے کہا کہ وہ انصاف حاصل کرنے کے لئے عدالت جائیں گے۔

فی الحال پولیس نے تو آج اپنی اس کارروائی کو انجام دے دیا ہے اب عدالتی فیصلہ کے بعد ہی حقیقت معلوم ہوگی