رامپور: مدرسہ کے استاد رکشہ چلانے پر مجبور

عالمی وبا کورونا وائرس کے سبب تعلیمی ادارے بند رہنے کی وجہ سے درس و تدریس سے وابستہ افراد کی زندگی پر اس کے کتنے منفی اثرات مرتب ہو رہے ہیں اس کا اندازہ اس بات سے لگایا جاسکتا ہے کہ ریاست اترپردیش کے رامپور کے تحصیل ٹانڈہ میں دینی مدرسہ میں تدریسی خدمات انجام دینے والے عابد زندگی بسر کے لئے ای رکشہ چلا رہے ہیں۔

کورونا کے سبب مسلسل تعلیمی ادارے بند رہنے کے سبب سب سے زیادہ منفی اثر دینی تعلیمی اداروں سے وابستہ افراد پر پڑا ہے۔ رامپور کا ٹانڈہ علاقہ جو مدرسوں کا شہر کہلاتا ہے۔ گذشتہ ڈیڑھ برسوں سے مدارس بند ہیں جس کی وجہ سے اساتذہ کے سامنے اب معاش کا مسئلہ در پیش ہے۔

ٹانڈہ کے رہنے والے محمد عابد ایک دینی مدرسہ سے فارغ ہیں اور فی الحال دارالعلوم غازی آباد کے مدرسہ میں تدریسی خدمات انجام دے رہے تھے۔ جس سے ان کا گذر بسر چل رہا تھا۔ لیکن کورونا نے اب ان کو رکشہ چلانے پر مجبور کر دیا ہے۔

محمد عابد کا کہنا ہے کہ وہ معمولی سی تنخواہ پر مدرسہ میں تدریسی خدمات انجام دے رہے تھے۔ ان کے پاس اتنی رقم بھی نہیں ہے کہ وہ اپنا کوئی دوسرا کام کر سکیں۔ اسی لئے وہ کرائے پر ای رکشہ لےکر چلانے پر مجبور ہیں۔

جب ان سے یہ پوچھا کہ ای رکشے چلانے سے انہیں کتنی آمدنی ہو تی ہے۔ تو انہوں نے کہا کہ روزمرہ کا خرچ اس سے نکل جاتا ہے۔