رامپور میں ضلع پنچایت کے صدر کے عہدے کے لیے انتخابات میں زرعی قوانین کے خلاف تقریباً 7 ماہ سے دھرنے پر بیٹھے ناراض کسانوں نے رامپور کلکٹریٹ پر واقع انتخابی مقام پر پہنچ کر سماجوادی پارٹی کی امیدوار نسرین جہاں کی حمایت کی۔
زرعی قوانین کے خلاف احتجاج کر رہے حکومت سے ناراض کسانوں نے ضلع پنچایت کے چیئرمین کے عہدے کے انتخاب میں سماجوادی پارٹی کی امیدوار نسرین جہاں کی حمایت کی۔
اس موقع پر ای ٹی وی بھارت سے خصوصی گفتگو کے دوران کسان رہنما صابر علی نے کہا کہ زرعی قوانین کو واپس لینے سے متعلق حکومت کسانوں کی بات نہیں سن رہی ہے اس لیے ہم بی جے پی امیدوار کو شکست دینے کے مقصد سے پہنچے۔
اسی طرح کسان روہت نے کہا کہ 'بی جے پی حکومت نے ہم پر بہت ظلم کئے ہیں۔ ہم اب مزید برداشت نہیں کر سکتے اس لیے ہم نے سماجوادی پارٹی کی حمایت کرنے کا فیصلہ کیا ہے۔
اس کے علاوہ کسان رہنما اجے کمار نے ضلع انتظامیہ اور پولیس پر الزام عائد کرتے ہوئے کہا کہ یہاں انتخابات صاف و شفاف نہیں ہوئے ہیں۔ انتظامیہ بی جے پی امیدوار کو جیت دلانے کے لیے بدعنوانی کرنے کی کوشش کر رہا ہے۔ سماجوادی پارٹی کے ووٹرز کو ڈرایا دھمکایا جا رہا ہے۔
انہوں نے مطالبہ کیا کہ میڈیا اہلکاروں کو پولنگ اسٹیشن کے باہر کیوں روکا گیا ہے انہیں سینٹر کے اندر بھیجا جائے۔
