ریاست اترپردیش کے ضلع سہارنپور کے دیوبند علاقہ میں مرکزی اور صوبائی حکومت کے خلاف زبردست احتجاج کیا گیا۔
اس دوران سماج وادی پارٹی کے سابق رکن اسمبلی معاویہ علی نے حکومت پر تنقید کرتے ہوئے کہا کہ موجودہ حکومت میں بیٹھے رہنما گانجا اور چلم پی کر اپنا وقت گزار رہے ہیں۔ ملک کے نوجوانوں اور کسانوں کی کوئی فکر نہیں ہے۔ اس دوران تحصیل احاطے میں بڑی تعداد میں پولیس فورس تعینات رہی۔
تفصیل کے مطابق سماج وادی پارٹی کے صدر اکھیلیش یادو کے کہنے پر سماج وادی پارٹی کے سابق رکن اسمبلی معاویہ علی کی قیادت میں پارٹی کارکنان نے حکومت کے خلاف نعرے بازی کرتے احتجاجی مظاہرہ کیا اور ایک میمورنڈم ایس ڈی ایم دیوبند کو سونپا۔
اس موقع پر معاویہ علی نے کہا کہ موجودہ مرکزی اور صوبائی حکومت عوام مخالف ہے۔ اس حکومت میں ہر طبقہ پریشان ہے۔ روزگار کا وعدہ کیا گیا تھا۔ اس حکومت میں تعلیم یافتہ نوجوانوں کو روزگار نہی مل پا رہا ہے۔ کسان خودکشی کرنے پر مجبور ہیں۔
انہوں نے مزید کہا کہ اس حکومت میں رہنما گانجا اور چلم پی کر اپنا وقت گزار رہے ہیں۔ وزیر اعلی سے لےکر بی جے پی رہنماؤں کو عوام کی پریشانی سے کوئی مطلب نہیں ہے۔ یہ حکومت ہر محاذ پر ناکام ہو چکی ہیں۔
