اس موقع پر اے ایم یو قانون فیکلٹی کے ڈین پروفیسر شکیل احمد صمدانی کو اردو ادب میں گراں قدر خدمات کے اعتراف میں 'علامہ اقبال' اور مسکان انٹر کالج، اسعد پبلک اسکول کے مینیجر کو تعلیمی میدان میں نمایاں کارکردگی پر 'مولانا ابوالکلام آزاد تعلیمی ایوارڈ' سے نوازا گیا ہے اور ای ٹی وی بھارت کے نمائندہ سہیل احمد اور ایک دیگر اردو اخبار کے نمائندے کو اردو صحافتی ایوارڈ سے سرفراز کیا گیا۔
اس موقع پر پروفیسر شکیل احمد صمدانی نے اپنے خطاب میں کہا کہ علامہ اقبال بھارت کے ہی نہیں بلکہ دنیا کے عظیم ترین شاعر تھے۔ انہوں نے تعلیم اور اردو زبان کی اہمیت پر زور دیا اور کہا کہ ہمیں اپنی نسلوں کو بہترین اور اعلیٰ تعلیم سے مزین کرنا ضروری ہے۔ اسی طرح سے اردو زبان کا استعمال کرنا اور اس کی حفاظت کرنا بھی ہم سب کی ذمہ داری ہے۔
پروفیسر صمدانی نے مزید کہا کہ علامہ اقبال کئی مرتبہ علی گڑھ تشریف لائے اور یہاں پر ان کو پروفیسری بھی دی گئی۔ علامہ اقبال نے سر سید احمد خان کے اوپر بھی نظم لکھی ہے اور نوجوانان علی گڑھ کے اوپر بھی لکھی ہے۔ اس لئے اے ایم یو میں علامہ اقبال کے نام سے چیئر قائم کی جائے گی۔ انشاء اللہ ہم لوگ پوری کوشش کریں گے اور ہمیں امید ہے کہ علامہ اقبال کے نام کی چیئر قائم ہوگی۔
معروف قلمکار ڈاکٹر ایس یو خان نے کہا کہ علامہ اقبال کے یوم پیدائش کے موقع پر عالمی یوم اردو بھارت ہی نہیں بلکہ پوری دنیا میں منایا جاتا ہے۔
انہوں نے کہا کہ علامہ اقبال کو حقیقی خراج تحسین اسی وقت پیش کیا جاسکتا ہے، جب ہم اردو زبان کو استعمال میں لائیں اور دوسروں کو بھی اردو سیکھنے کی ترغیب دیں۔ انہوں نے تنظیم کو اردو کی ترقی میں نمایاں کردار ادا کرنے پر مبارکباد پیش کی۔ انہوں نے کہا کہ اردو زبان دو قوموں کی درمیان ایک پل کا کام کرتی ہیں اور اس کی حفاظت کی ذمہ داری اس ملک کے مسلمانوں کی ہے۔
اپنے صدارتی خطاب میں ڈاکٹر افشاں ملک نے کہا کہ اردو بھارت کی گنگا جمنی تہذیب کی علامت ہے۔ اردو بہت ہی پیاری اور شیریں زبان ہے۔ اس زبان نے فرقہ وارانہ ہم آہنگی کو ہمیشہ فروغ دیا۔ انہوں نے کہا موجودہ وقت میں اردو کی جانب عوام کا رجحان بڑھا ہے اور یہ زبان پوری دنیا میں پھیل چکی ہے۔
مزید پڑھیں:
بھارت کے پہلے وزیر تعلیم کا یوم پیدائش آج
پروگرام کی نظامت اردو کے استاذ کلیم تیاگی نے بحسن و خوبی انجام دی اور تلاوت قرآن کریم شمشاد و نعت پاک کا نذرانہ ڈاکٹر افشاں ملک نے پیش کیا۔
